Immýndyq júıeniń álsireýi
Ulybrıtanııanyń Ulttyq densaýlyq saqtaý qyzmeti (NHS) málimetinshe, uıqy kezinde aǵza syrtqy zııandy áserlerden qorǵaný úshin erekshe belsendilik tanytady. Immýndyq júıe uıqy barysynda sıtokınder dep atalatyn qorǵanys zattaryn óndiredi. Bul zattar bakterııalar men vırýstarmen kúresýge kómektesedi. Uıqy tapshylyǵy bul prosesti buzyp, aǵzanyń qorǵanys qabiletin álsiretedi. Zertteýler kórsetkendeı, táýligine 6 saǵattan az uıyqtaý vaksınalarǵa aǵzanyń reaksııasyn tómendetýi múmkin.
Tynyshsyzdyq pen mazasyzdyq
Mamandardyń aıtýynsha, uıqy men mazasyzdyq bir-birimen tyǵyz baılanysty. Uıqy tapshylyǵy kúızelisti kúsheıtedi, al kúızelis óz kezeginde uıqyny buzady. Osylaısha, bul másele tuıyq sıklge aınalyp, psıhıkalyq jaǵdaıdy nasharlatady.
Gormonaldy tepe-teńdiktiń buzylýy
Uıqynyń jetkiliksizdigi áıelderdiń reprodýktıvtik júıesine de áser etýi múmkin. Ǵalymdardyń zertteýleri uıqy tapshylyǵy qalqansha bez gormondarynyń deńgeıine áser etip, etekkir sıkliniń buzylýyna, anovýlıasııaǵa jáne basqa da qıyndyqtar týdyratynyn anyqtady.
Salmaqtyń artýy
Uıqy aǵzadaǵy gormondar deńgeıine áser etedi. Uıqy tapshylyǵy tábetti arttyryp, artyq tamaqtanýǵa jáne salmaq qosýǵa ákeledi. Sonymen qatar zertteýler jaqsy uıyqtamaǵan adamdarda semizdikke beıimdilik joǵary bolatynyn kórsetti.
Jumys ónimdiliginiń tómendeýi
Uıqynyń sapasy men kólemi kúndelikti belsendilikke de áser etedi. Eger adam jetkilikti demalmasa, onyń zeıini, este saqtaý qabileti jáne sheshim qabyldaý daǵdylary nasharlaıdy. Bul jumys ónimdiligin tómendetip, sharshańqylyqty arttyrady.
Este saqtaý qabiletiniń álsireýi
Uıqy jetkiliksizdi tek zeıin men ónimdilikke ǵana emes, uzaqmerzimdi kognıtıvtik densaýlyqqa da áser etedi. Zertteýler jetkilikti túrde uıyqtamaý este saqtaý qabiletin nasharlatyp, oılaý jyldamdyǵyn tómendetetinin kórsetken. Odan bólek, sozylmaly uıqysyzdyq Alsgeımer aýrýynyń damý qaýpin arttyrýy múmkin.
Uıqy sapasyn jaqsartý joldary
Uıqy rejımin saqtaý mańyzdy. Kúndelikti rejımdi qalyptastyrý, ekran ýaqytyn shekteý, fızıkalyq belsendilikpen aınalysý jáne jaıly orta jasaý sapaly demalysqa yqpal etedi.
