Foto: aqtobegazeti.kz
Negizgi avtojoldardy rekonstrýksııalaý jumystaryn aıaqtaý jáne sıfrlandyrý
2024 jyldyń naýryz aıynda «Adal adam – Adal eńbek – Adal tabys» Ulttyq quryltaı otyrysynda Prezıdent Qasym-Jomart Toqaev keminde 12 myń shaqyrym avtojoldy rekonstrýksııalaý jáne jóndeýden ótkizýdi tapsyrǵan bolatyn.
2024 jyldyń qorytyndysy boıynsha qoıylǵan mindetterdi oryndaý sheńberinde 12 myń shaqyrym jolǵa qurylys, jóndeý jáne rekonstrýksııalaý jumystary júrgizilgen. Onyń 7 myń shaqyrymynda negizgi jumystar aıaqtalǵan. Jobaǵa 10 myńnan astam tehnıka men 25 myń maman qatysqan. Nátıjesinde, respýblıkalyq mańyzy bar joldardyń qalypty jaǵdaıy 93%-ǵa, al jergilikti joldardyń normatıvtik jaǵdaıy 89%-ǵa deıin jaqsardy.
Negizgi basymdyqtardyń biri strategııalyq mańyzy bar tórt avtomobıl jolyn rekonstrýksııalaý jumystaryn aıaqtaý boldy:
«Qaraǵandy – Almaty» (885 km): tórt jolaqty, zamanaýı tosqaýyl qorshaýlary jáne tolyq jaryqtandyrý arqyly birinshi tehnıkalyq sanatqa deıin rekonstrýksııalaý jumysy aıaqtaldy. Joba aıasynda 33 kópir, 48 ótkel salynyp, sondaı-aq 700 sý ótkizgish qubyr ornatyldy.
«Taldyqorǵan – О́skemen» (768 km): jol I–II tehnıkalyq sanatqa deıin qaıta jańartyldy. Qurylys barysynda jańa kópirler, jol aıryqtary men sý ótkizý qurylystary paıda boldy, bul Abaı, Shyǵys Qazaqstan jáne Jetisý oblystary arasyndaǵy qozǵalys qaýipsizdigi men jaılylyǵyn edáýir arttyrdy.
«Atyraý – Astrahan» (212 km): Qazaqstandy Reseı Federasııasymen baılanystyratyn bul mańyzdy kólik baǵyty II sanatqa jańartyldy. Joldyń barlyq uzyndyǵyna 6 kópir, 1 ótpe jol, 60 ótkizý qurylysy jáne demalys oryndary salyndy.
«Aqtóbe – Qandyaǵash» (96 km): rekonstrýksııalaý joldyń tórt qozǵalys jolaǵymen I–II sanatqa deıin jaqsarýyna ákeldi. Jumys aıasynda 700 myń tonnaǵa jýyq asfalt-beton qospasy tóselip, 10 kópir, 5 jol ótpesi jáne 3 jol aıryǵy salyndy.
Bıyl qurylys-jóndeý jumystary 13 myń shaqyrymnan astam joldy qamtyǵan. Onyń 7 myń shaqyrymynda ortasha jóndeý jumystary júrgizilip jatyr. «Jezqazǵan – Petropavl», «Muqyr – Qulsary», «Oral – Atyraý» jáne basqa da avtojoldar qamtyldy, «Ortalyq – Batys» avtojolynyń, sondaı-aq «Aqtóbe – Ulǵaısyn», «Qaraǵandy – Jezqazǵan» ýchaskeleriniń, Saryaǵash, Rýdnyı jáne Shymkent aınalma joldarynyń qurylysy bastaldy. «Qalbataý – Maıqapshaǵaı» joly aıaqtalady.
«Júk kólikteriniń shamadan tys júktemesin baqylaý úshin 2025 jyldyń aıaǵyna deıin 220 avtomattandyrylǵan ólsheý stansasy ornatylady. Sıfrlandyrýǵa aıryqsha kóńil bólinýde. Elektrondy bıletter, sıfrlyq dıspetcher qyzmeti, aldyn ala tehnıkalyq qyzmet kórsetý, ıntellektýaldy kólik júıeleri engizilip jatyr», dedi kólik vıse-mınıstri Maqsat Qalıaqparov.
