Foto: Aýyl sharýashylyǵy mınıstrligi
2025 jyly elimizdegi jalpy egis kólemi 322,8 myń ga-ǵa artyp, 23,6 mln ga-ǵa jetken (2024 jyly – 23,3 mln ga). Sonyń ishinde dándi jáne dándi-burshaqty daqyldar alqaby 630 myń ga-ǵa azaıyp, 16 mln ga-ny quraǵan, al bıdaı egistigi 884,6 myń ga-ǵa qysqaryp, 12,3 mln ga boldy.
Sala mınıstrliginiń baspasóz qyzmetiniń málimdeýinshe bosatylǵan jerler anaǵurlym tabysty daqyldarǵa berildi. Kúnbaǵys rekordtyq 1,8 mln ga aýmaqta egildi – bul ótken jylmen salystyrǵanda 481,5 myń ga artyq. Kartop egistigi de ósim kórsetip otyr: kólemi 9,3 myń ga-ǵa artyp, 131,2 myń ga-ǵa jetti. Onyń ishinde uıymdasqan sharýashylyqtardaǵy ósim 12,5 myń ga qurap, 84,5 myń ga-ǵa jetti.
Sonymen qatar sýarmaly daqyldar alqaby azaıtylyp jatyr. 2025 jyly maqta 144,5 myń ga jerge egildi, onyń ishinde 50 myń ga tamshylatyp sýarýmen qamtylǵan. Qyzylorda oblysynda kúrish alqaby 85,6 myń ga-dan 80,9 myń ga-ǵa deıin qysqardy.
Egisti ártaraptandyrý ishki azyq-túlik balansyn nyǵaıtýǵa, jekelegen daqyldarǵa táýeldilikti azaıtýǵa, agroónerkásiptik keshenniń turaqtylyǵyn jáne fermerlerdiń tabysyn arttyrýǵa múmkindik beredi. Al jer resýrstaryn neǵurlym utymdy paıdalaný eldiń azyq-túlik qaýipsizdiginiń negizine aınalýǵa tıis.
