Foto: Oqu-agartu ministrligi
Qalanyń halyq eń tyǵyz qonystanǵan aýdandarynyń biri «Araı» shaǵyn aýdanynda 1500 oryndyq jańa mektep esigin aıqara ashty. Bul – Qyzylordadaǵy eń iri bilim oshaǵy. Ol synyptardaǵy artyq júktemeni azaıtyp, balalarǵa jaıly ortada bilim alýǵa múmkindik beredi. Sondaı-aq «Qyzyljarma» shaǵyn aýdanynda 900 oryndyq jańa mektep paıdalanýǵa berildi. Ol eski ǵımarattyń ornyna salynǵan ári zamanaýı standarttarǵa saı keledi.
Oblys ákimi atap ótkendeı, Qyzylorda úsh aýysymdy oqytý máselesin túbegeıli sheshken kóshbasshy aımaqtardyń qataryna endi. Buǵan deıin mundaı nátıjege Shymkent qalasy men Aqmola oblysy qol jetkizgen bolatyn.
Sala mınıstrliginiń baspasóz qyzmetiniń málimdeýinshe óńir turǵyndary aldynda sóz sóılegen Oqý-aǵartý mınıstri sońǵy eki jylda júıeli jańǵyrtý men mektep ınfraqurylymyn keńeıtý nátıjesinde elimizde úsh aýysymdy mektepterdiń sany úsh esege qysqarǵanyn erekshe atap ótti.
«Eki jyldyń ishinde Qazaqstandaǵy úsh aýysymdy mektepterdiń sany úsh ese azaıdy. Búginde shamamen 3 myń mektep bir aýysymda, 5 myńǵa jýyq mektep eki aýysymda jumys isteıdi. Mundaı nátıjege memleket tarapynan jańa mektepter qurylysy men ınfraqurylymdy jańǵyrtýǵa baǵyttalǵan aýqymdy sharalardyń arqasynda qol jetkizilip otyr. 2025-2026 oqý jyldary 267 myń orynǵa arnalǵan 232 jańa mekteptiń qurylysy josparlanǵan. Sonymen birge mektepterdi jańǵyrtý boıynsha renovasııadan ótkizý baǵdarlamasy júzege asyrylyp jatyr. Bıyl bul baǵdarlama 190 myń oqýshy bilim alatyn 245 mektepti qamtıdy», dedi Ǵanı Beısembaev.
Búginde Qyzylorda oblysynda 8 jaıly mektep bar. Onyń ekeýi osy aptada ashylsa, taǵy ekeýi jańa oqý jyly bastalǵanǵa deıin oqýshylardy qabyldaýǵa daıyn bolmaq.
