Q.Toqaevtyń aıtýynsha, ótken jyly eki eldiń taýar aınalymy 44 mlrd dollarǵa jetken. Bul – buryn-sońdy bolmaǵan eń joǵary kórsetkish.
«Biz Tóraǵa Sı Szınpın myrzamen mazmundy jáne óte tıimdi kelissózder júrgizdik. Qos eldiń ár saladaǵy yntymaqtastyǵy boıynsha ortaq kelisimge keldik. Qazaqstan men Qytaı arasyndaǵy qarym-qatynastyń bolashaǵy jarqyn bolatynyna zor senim bildirdik», dedi Qazaqstan Prezıdenti.
Negizi, Qytaı – Orta Azııanyń basty saýda seriktesi. Jalpy, Qytaı 2023 jyldyń mamyrynda Qytaı – Ortalyq Azııa sammıtin alǵash ret rásimdegen kezden bastap Qytaıdyń Ortalyq Azııa elderimen qarym-qatynasy jańa dáýirge aıaq basty.
Mańyzdy qujatqa qol qoıdy
Qytaı tóraǵasy Sı Szınpın Qytaı men Qazaqstan bir-birine senimdi strategııalyq áriptester ekenin aıtyp, eki eldi jan-jaqty yntymaqtastyqty nyǵaıtýǵa shaqyrdy.
Bul týraly Sı Szınpın Shanhaı yntymaqtastyq uıymynyń (ShYU) 2025 jylǵy sammıtinde, sondaı-aq Qytaıdyń Ekinshi dúnıejúzilik soǵystaǵy jáne japon basqynshylyǵyna qarsy kúrestegi Jeńistiń 80 jyldyǵyna arnalǵan is-sharalaryna qatysý úshin kelgen Qazaqstan Prezıdenti Qasym-Jomart Toqaevpen kezdesken kezinde aıtty.
«Halyqaralyq jaǵdaı qalaı ózgerse de, eki el tatý kórshilik saıasatyn buljytpaı ustanýy kerek», dedi Sı Szınpın.
Onyń aıtýynsha, eki kórshi el yntymaqtastyǵynyń toǵysqan múddeleri men ósýiniń jańa baǵyttaryn ashý úshin óz damý strategııalaryn sáıkestendirýge, kópjaqty yntymaqtastyq arqyly ShYU-ny nyǵaıtýǵa jáne halyqaralyq júıeniń neǵurlym ádiletti jáne parasatty bolýyna yqpal etýi kerek.
Al Q.Toqaev óz kezeginde Qazaqstan – Qytaı qarym-qatynastary tarıhtaǵy eń jaqsy kezeńde ekenin, eki el ótken jyly saýda kólemi rekordtyq joǵary bolǵanyn jáne Qytaımen qarym-qatynasty jańa beleske shyǵarý úshin yntymaqtastyqty tereńdetýge daıyn ekenin aıtty.
Kezdesý barysynda eki el basshysy energetıka, tehnologııa, turǵyn úı, bilim, sport jáne janýarlar dúnıesin qorǵaý salalaryn qamtıtyn 20-dan asa yntymaqtastyq qujatqa qol qoıdy.
Tıanszındegi nátıjeli kelissózder
Qazaqstan Prezıdenti Qasym-Jomart Toqaev tarıhı qala Tıanszınde Qytaı basshysymen kelissóz júrgizdi. Kezdesý barysynda Q.Toqaev Sı Szınpınge jyly qarsy alǵany úshin alǵys bildirdi.
«Qazaqstan elińizdiń ShYU-ǵa tóraǵalyq etýin tolyq qoldaıdy jáne onyń kún tártibin ilgeriletýge belsendi úles qosyp otyr. Sizderdi Ekinshi dúnıejúzilik soǵystaǵy Jeńistiń jáne Qytaıdyń japon mılıtarızmin jeńgeniniń 80 jyldyǵymen quttyqtaǵym keledi. Fashızmdi jeńýge orasan zor úles qosyp, teńdesi joq erlik, shynaıy otansúıgishtik pen qaıtpas erik-jiger tanytqan Qytaı halqynyń erlik isteri úlken qurmet pen jahandyq moıyndaýǵa laıyq», dedi Prezıdent Q.Toqaev.
Qytaı Qazaqstannyń eń iri saýda seriktesi bolyp qala bermek. Birlesken iri jobalar turaqty damyp keledi. 2025 jyl Qazaqstandaǵy Qytaı týrızminiń jyly bolyp belgilendi. Sonyń aıasynda Qazaqstanda ekinshi jáne úshinshi Lý Ban sheberhanalary ashyldy. Beıjińde Qazaq mádenı ortalyǵy da quryldy.
Daıyndaǵan –
Gúlnar JOLJAN,
«Egemen Qazaqstan»
