Foto: Vıdeodan alynǵan kadr
Memleket basshysy óz sózinde qazir dúnıejúzinde ınvestısııaǵa talas kúsheıip bara jatqanyn atap ótti.
«Jańa ınvestısııalyq kezeńdi bastaýymyz qajet. Qazirgi ınvestısııa tartý saıasaty mardymdy dep aıta almaımyn. Qarajattyń kóbi shıkazat salalaryna quıylyp jatyr. Jalpy bul jaman emes. Osyndaı ınvestısııalar bizge qajet. Biraq qazir aldymyzda turǵan mindet basqa. Bul óńdeý salasyna kóbirek qarajat tartý. Sondyqtan Úkimet ınvestısııa tartý saıasatyna basqasha kózqaraspen qaraý kerek. Qajet bolsa joǵary tehnologııalarǵa salynatyn ınvestısııalarǵa jeńildik berýge bolady», dedi Prezıdent.
Sondaı-aq Prezıdent memlekettik ınvestısııasymen jeke bıznestiń iri bastamalaryna birdeı nazar aýdarý qajet ekendigin aıtty. Iri ınvestorlar qajet orta jáne shaǵyn ınvestorlarmen tyǵyz baılanysta jumys isteý qajet.
«Qarajattyń qaı baǵytqa qandaı maqsatpen jáne qansha kólemde qajet ekenin naqty bilý qajet. Investısııaǵa tapsyrys óndiristiń suranysyna saı jasalýy kerek. Elimizdegi ınvestorlarmen qarym-qatynas júıesi kúrdeli ári bytyrańqy. Qaǵazbastylyq kóp, túrli organdardyń quzyrettiligi qaıtalanady. Al qazirgi kúrdeli ahýal kezinde ınvestısııa tartý kezek kúttirmeıtin másele. Bizge jańa ustanym kerek», dedi Memleket basshysy.
