Foto: Ashyq derekkóz
«Byltyr bizdiń terrıtorııamyz arqyly júk tasymaldaý kólemi 1 mıllıard tonnadan asty. Sonymen birge elimizdiń tranzıttik áleýetin arttyrýǵa áli de zor múmkindik bar. «Soltústik – Ońtústik» kólik dálizi Parsy shyǵanaǵy men Ońtústik Azııa elderiniń naryǵyna tikeleı jol ashady. Al «Shyǵys – Batys» dálizi men Qytaıdyń «Bir beldeý, Bir jol» jahandyq bastamasy Qazaqstannyń Eýrazııadaǵy negizgi qurlyq joly retindegi rólin kúsheıte túsedi», dedi Memleket basshysy.
Qazaqstan úshin Transkaspıı kólik baǵytyn damytýdyń mańyzy arta bastady. Prezıdent atap ótkendeı, bul baǵyttardyń bári birtutas júıe sııaqty jumys istep, elimizge edáýir tabys ákelýi kerek.
«Sondaı-aq ınfraqurylymdy jaqsartýǵa jańa ınvestısııa tartýy qajet, sapaly jumys oryndaryn ashýǵa yqpal etýge tıis. Osy oraıda, sıfrlyq tásilderdi aýqymdy túrde qoldanǵan abzal. Onsyz eshqandaı tıimdilik bolmaıdy. О́ńirlerdiń kólik baılanysyna qatysty máselemen myqtap aınalysý kerek. Iri tranzıttik aımaq sanalatyn Qazaqstan úshin bul baǵyt aıryqsha mańyzdy», dedi Prezıdent.
Esterińizge sala keteıik, biz taıaýda Vetnamǵa Qytaıdyń Lıanıýngan porty arqyly bıdaıdyń alǵashqy legin jónelttik.
«Aýǵanstanda Pákistan naryǵyna shyǵýǵa múmkindik beretin «Týrgýndı – Gerat» temir jolyn salý josparda bar. Alaıda, jańa kólik baǵyttaryna jáne jańa naryqtarǵa jol ashatyn múmkindikter munymen shektelmeıdi. Alda atqarar sharýa kóp», dedi Memleket basshysy.
Jalpy, álemde tranzıt úshin báseke kúsheıip bara jatyr. Basqa da arzan balama baǵyttar men joldar usynylyp otyr. Prezıdent tranzıttik tasymaldyń kólemin arttyramyz desek, biz aldyn ala áreket etip, árdaıym bir qadam alda bolýymyz kerektigin eske saldy.
«Taǵy da qaıtalap aıtarym, ınfraqurylymdy jańǵyrtý isin odan ári jalǵastyryp, osy saladaǵy ozyq el bolý úshin sıfrlandyrý men jasandy ıntellektini keń aýqymda paıdalanǵan jón», dedi Qasym-Jomart Toqaev.
Sonymen qatar Prezıdent óz sózinde bıyl uzyndyǵy – 836 shaqyrym bolatyn «Dostyq – Moıynty» temir jolynyń ekinshi jelisi iske qosylatynyn atap ótti. Joba óte qysqa merzim ishinde júzege asqan. Bul joldyń mán-mańyzy erekshe, sebebi «Shyǵys-Batys» baǵytynyń júk ótkizý múmkindigin aıtarlyqtaı arttyrady.
«Biraq munymen toqtap qalýǵa bolmaıdy. Úkimet «Baqty-Aıagóz», «Qyzyljar-Moıynty» jobalaryn ýaqytyly júzege asyrýǵa tıis. Sebebi, atalǵan jobalar elimizdegi temirjol júıesiniń tolyq qańqasyn qalyptastyrady», dedi Toqaev.
