Jaqynda Ulytaý oblysynda vıse-mınıstr Ardaq Amangeldıevtiń basshylyǵymen Densaýlyq saqtaý mınıstrliginiń arnaıy jumys toby jumysyn bastady.
Jumys tobyn qurýdyń maqsaty – óńirdegi medısınalyq uıymdardyń qyzmetine keshendi taldaý júrgizý, ózekti máselelerdi anyqtaý jáne turǵyndar úshin medısınalyq kómektiń sapasy men qoljetimdiligin arttyrý boıynsha sharalar usyný.
Oblys aktıvi aldynda sóılegen sózinde A.Amangeldıev: «Jezqazǵanǵa elorda men Qaraǵandy medısına ýnıversıtetteriniń ókilderi, sondaı-aq onkologııa, kardıohırýrgııa, neırohırýrgııa, travmatologııa, ana men bala, medısınalyq-sanıtarııalyq alǵashqy kómek sııaqty jetekshi respýblıkalyq ǵylymı ortalyqtar men klınıkalardyń basshylary jiberiledi. Jergilikti mamandarmen birge olar óńirlik densaýlyq saqtaý júıesin nyǵaıtý boıynsha is-qımyl josparyn ázirleıdi», dep atap ótti
О́zekti máselelerdi sheshý úshin MSAK, sanıtarııalyq-epıdemıologııalyq qyzmet jáne áleýmettik medısınalyq saqtandyrý qory mamandarynyń qatysýymen jeke vedomstvoaralyq top quryldy.
Bul top jergilikti jerlerdegi jaǵdaıdy júıeli túrde zerttep, belgilengen sharalardyń iske asyrylýyn baqylaýdy qamtamasyz etetin bolady.
О́ńirge kelgen keıin vıse-mınıstr 27 myńnan astam turǵyn tirkelgen Jańaarqa aýdanynyń ortalyq aýdandyq aýrýhanasyna bardy. Ondaǵy medısınalyq uıymnyń qyzmetimen tanysyp, aýdandyq ákimdik ókilderiniń, máslıhat depýtattarynyń jáne medısınalyq jurtshylyqtyń qatysýymen keńes ótkizdi. Odan keıin Jezqazǵan, Sátbaev qalalarynyń, Ulytaý aýdanynyń stasıonarlary men emhanalarynda boldy.
Vıse- mınıstr A. Amangeldıev bas dárigerlerdiń kadrlarmen qamtamasyz etý, ana men bala óliminiń kórsetkishteri, ınfeksııalyq aýrýlarmen kúres, MSAK jumysy týraly aqparatyn tyńdap, aýrýhanalardy tehnıkalyq jaraqtandyrý, sanıtarııalyq kólikti jańartý, kelgen medısına qyzmetkerlerin áleýmettik qoldaý máselelerin nazarǵa aldy.
Ulytaý oblysy
