Foto: Aqorda
Memleket basshysyna Konstıtýsııalyq sot qyzmetiniń nátıjeleri jóninde málimet berildi.
Elvıra Azımovanyń aıtýynsha, 2,5 jyl ishinde vedomstvoǵa azamattardan 11 myńnan astam ótinish kelip túsken. Konstıtýsııalyq sot sýdıalary ótinishterdi qaraý barysynda 5 myńnan asa quqyq normasyn zerdeledi. Tekserý qorytyndysy boıynsha 300-den astam sheshim qabyldandy. Sonyń ishinde zańdar men basqa da normatıvtik aktilerdiń Konstıtýsııaǵa sáıkestigi turǵysynan 74 qorytyndy qaýly shyǵaryldy. Osylaısha, 20 quqyq normasy Konstıtýsııaǵa qaıshy dep tanylyp, 25 quqyq normasyna naqty túsindirme berildi.
Búginge deıin zańdarǵa ózgerister men tolyqtyrýlar engizý arqyly 41 normatıvtik qaýly oryndaldy. Qazir Konstıtýsııalyq sottyń 19 normatıvtik qaýlysyndaǵy quqyqtyq ustanymdary eskerilgen 8 zań jobasy Parlament palatalarynda qaralyp jatyr.
Qasym-Jomart Toqaevqa azamattar egjeı-tegjeıli quqyqtyq keńes alý úshin Konstıtýsııalyq sot apparaty janyndaǵy О́tinishterdi qabyldaý ortalyǵyna júgine alatyny jóninde baıandaldy. Buǵan deıin mundaı konsýltasııalardy myńnan astam adam aldy. Ortalyqtaǵy zań konsýltanttary men advokattar azamattarǵa tegin keńes beredi.
Prezıdenttiń pikirinshe, Konstıtýsııalyq sot azamattardyń quqyqtary men bostandyqtaryn qorǵaýǵa kepil bolýǵa tıis. Sonymen qatar sot organynyń quqyqtyq ustanymdaryn dáıekti túrde iske asyrý mańyzdy.
