Onyń aıtýynsha, Memleket basshysy Qasym-Jomart Toqaev halyqqa arnaǵan árbir Joldaýynda Ádiletti Qazaqstan qurýdaǵy óz prınsıpteriniń myzǵymaıtynyn kórsetip keledi. «Áserli Parlament», «Zań jáne tártip», «Estıtin memleket», «Taza Qazaqstan», «Adal azamat» sııaqty tujyrymdamalar qoǵam sanasynyń ajyramas bóligine aınaldy.
Sonymen qatar, jyldar boıy qordalanǵan máselelerdi sheshý naqty jobalyq tásildi qajet etedi. Bul turǵyda «AMANAT» partııasy Prezıdent baǵytyn berik ustanyp keledi. Mysaly, sońǵy úsh jylda «Jer amanaty» jobasy aıasynda paıdalanylmaı jatqan jáne zańsyz ıelengen aýyl sharýashylyǵy jerlerin memleket menshigine qaıtarý boıynsha aýqymdy jumys júrgizildi. 2022 jyldan beri 13,5 mln gektardan astam jer memleketke qaıtaryldy.
Alaıda, Erlan Saırov atap ótkendeı, qaıtarylǵan jerdiń tek 6 mln gektary ǵana jańa jer paıdalanýshylarǵa berilgen. Al 7,5 mln gektar jer bos tur, sonymen qatar 82,9 mln gektar jer qory tıimsiz paıdalanylyp jatyr. Buǵan qosa, 29 mln gektardan astam jer degradasııaǵa ushyraǵan, onyń ishinde shamamen 3 mln gektar jer tuzdanýǵa beıim.
Depýtat jerdi tıimdi qaıta bólý úshin topyraqtyń sapasy, jerdiń ónimdiligi men aýyl sharýashylyǵynyń ártúrli túrine jaramdylyǵy týraly naqty derekter qajet ekenin aıtty. Alaıda Qazaqstanda mundaı derekterdi shoǵyrlandyratyn biryńǵaı aqparattyq júıe joq. Bul jaǵdaı azyq-túlik qaýipsizdigine, aýyldaǵy jumyspen qamtýǵa jáne ınvestısııalyq tartymdylyqqa tikeleı áser etýde.
Osyǵan baılanysty Prezıdent Qasym-Jomart Toqaev Joldaýynda jerdi onyń qunyn túsinetinderge ǵana berý kerektigin atap óti p, Jer resýrstarynyń sıfrlyq kartasyn jasaýdy tapsyrdy.
«AMANAT» fraksııasy bul máseleni sheshý úshin:
-
Kelesi egis naýqanyna deıin 7,5 mln gektar jerdi aýyl turǵyndary men fermerlerge ádil jáne ashyq túrde úlestirýdi;
-
Jer resýrstarynyń sıfrlyq kartasy men jaıylymdar kadastryn jedel iske qosýdy;
-
Jerdiń naqty derekterin kadastrlyq málimettermen biriktirýdi usyndy.
