Foto: Memlekettik qyzmet isteri agenttigi
Shara barysynda kadr saıasatyn avtomattandyrýǵa arnalǵan zamanaýı platformalar men memlekettik qyzmettiń aralas (gıbrıdti) modelin qalyptastyrýǵa baǵyttalǵan jobalar usynyldy. Jıynǵa memlekettik jáne jekemenshik uıymdardyń HR-mamandary, sondaı-aq sıfrlyq HR-tehnologııalardy engizý baǵytynda jumys isteıtin sarapshylar qatysqan.
Agenttik tóraǵasy Darhan Jazyqbaı memlekettik jáne jeke sektor arasyndaǵy áriptestikti damytýdyń mańyzdylyǵyn jáne HR salasynda sıfrlyq transformasııa júrgizýdiń ózektiligin atap ótti. Ol Prezıdent Joldaýynda aıtylǵan bastamalarmen tolyq úndesetinin jetkizdi. Naqtyraq aıtqanda, Qazaqstandy sıfrlyq memleketke aınaldyrý, jasandy ıntellekt quzyretterin damytý jáne memlekettik ınstıtýttardyń ashyqtyǵy men tıimdiligin arttyrý úshin platformalyq sheshimder men úlken derekterdi keńinen qoldaný mindetteri alǵa qoıylyp otyr.
Kezdesý sheńberinde qatysýshylar Agenttiktiń qyzmetimen jáne basym baǵyttarymen tanysty. Olardyń qatarynda memlekettik qyzmetke sıfrlyq formattaǵy irikteý júıesi, «e-Qyzmet» platformasy jáne biryńǵaı kadrlyq júıe arqyly HR-prosesterdi avtomattandyrý máseleleri boldy.
Sondaı-aq Prezıdent bastamasymen iske asyrylǵan aýqymdy jobalardyń biri – Prezıdenttik jastar kadr rezervi tanystyryldy. Bul joba talantty jastardy qoldaý men memlekettik basqarý júıesine jańa býyn kásibı kadrlardy tartýda mańyzdy quralǵa aınalyp otyr.
Agenttik tóraǵasynyń orynbasary Á.Ǵ. Ahmedıar jıyn barysynda memlekettik qyzmetti damytýdyń 2024–2029 jyldarǵa arnalǵan tujyrymdamasyna sáıkes ázirlenip jatqan «Memlekettik qyzmet týraly» Zańnyń jańa redaksııasynyń jobasyn usyndy.
Mundaı ashyq is-sharalar kadrlyq saıasattyń aıqyndylyǵyn qamtamasyz etip qana qoımaı, memlekettik organdar men kvazımemlekettik sektor arasynda kásibı baılanystardy nyǵaıtýǵa, tájirıbe almasýǵa jáne tıimdi dıalog ornatýǵa yqpal etedi.
