Ekologııa, qorshaǵan ortany qorǵaý jáne klımattyń ózgerýi mınıstrligine qarasty Orman sharýashylyǵy, bıoalýantúrlilik jáne ekotýrızm salasyndaǵy saıasatty iske asyrý departamentiniń basshysy Bahrom Holhýjaev pen Ormandardy jáne erekshe qorǵalatyn tabıǵı aýmaqtardy damytý jáne shóleıttenýge qarsy kúres basqarmasynyń bas mamany Sarvar Ahmedov Oral qalasyna arnaıy saparmen keldi. Olardy Jáńgir han ýnıversıtetiniń ǵylym jónindegi prorektory Áljan Shámshidin qabyldady. О́zbekstandyq delegasııanyń maqsaty – Jáńgir han ýnıversıteti ǵalymdarynyń tálimbaqta kıik ósirý tájirıbesimen tanysý. Oraldyq ǵalymdar bul baǵytta birneshe jyldan beri nátıjeli jumys júrgizip keledi.
Meımandar bilim ordasynyń ǵalymdarymen birge qala shetindegi «Aqbóken» tálimbaǵyna baryp, qolǵa úıretilgen dala janýarlaryn kózderimen kórip, ondaǵy jumys barysymen tanysty.
«О́zbekstan úkimeti Qaraqalpaqstan Respýblıkasy aýmaǵynda kıik sanyn kóbeıtýdi maqsat etip otyr. Bıyl arnaıy jumys toby da quryldy. Biz aldymen Qaraqalpaqstan jerinde-gi jergilikti jaǵdaıdy, ondaǵy qoryqtar men tálimbaqtardyń jaı-kúıin zerttedik. Osy alǵashqy saparymyzda Batys Qazaqstan agrarlyq-tehnıkalyq ýnıversıtetiniń kıikti tálimbaqta ustaý tájirıbesimen tanyspaqpyz. Buıyrsa, Qaraqalpaqstan jerinde de osyndaı tálimbaq qurý josparymyzda bar», dedi B.Holhýjaev.
О́zbekstanda buǵan deıin aqbókendi qoldan ósirý tájirıbesi bolmaǵan. Biraq tabıǵı jolmen ózdiginen barǵan shaǵyn toby kezdesedi. Sońǵy málimetke qaraǵanda, О́zbekstan aýmaǵynda qazir shamamen 300-deı kıik bar. Ǵalymdar bul janýardyń sanyn kóbeıtýge den qoıyp otyr.
«Osy baǵytta Qazaqstan tarapynan ekologııalyq dáliz qurý týraly másele kóterildi. Muny da aldaǵy ýaqytta jan-jaqty talqylaıtyn bolamyz», deıdi meımandar.
Jáńgir han ýnıversıtetiniń ǵylym jónindegi prorektory Áljan Smaıylulynyń aıtýynsha, bul jobaǵa buǵan deıin Ázerbaıjan men Qytaı eliniń mamandary da qyzyǵýshylyq tanytqan.
Batys Qazaqstan oblysy
