Qysqy kezeńde janýarlardy qoldaý – bıoalýantúrlilikti saqtaýmen tikeleı baılanysty. «Býrabaı» memlekettik ulttyq tabıǵı parkinde 48 sútqorekti túri, 221 qus túri jáne Qazaqstannyń Qyzyl kitabyna engen sırek kezdesetin faýna ókilderi mekendeıdi. Sońǵy sanaq nátıjesi boıynsha park aýmaǵynda 1472 askanııa buǵysy, 1429 sibir eligi, 696 qaban, 141 bulan, sondaı-aq sırek jyrtqyshtar – 55 sileýsin men 38 qasqyr mekendeıdi.
Ulttyq parktiń qyzmetkerleri qysqy kezeńde jabaıy janýarlardy qoldaýǵa baǵyttalǵan bıotehnıkalyq is-sharalardy júıeli túrde júzege asyrady. Jaz jáne kúz mezgilderinde shóp, butaqtyq azyq, kókónister daıyndalady. Qys kezinde arnaıy astaýlar men qosymsha qorektendirý alańdaryna turaqty túrde jetkizilip otyrady.
Bıyl 450 tonnadan astam shóp, shamamen 19 tonna tuz, 108 tonna aǵash japyraǵy, 250 tonnadan astam dándi daqyldardan jasalǵan jem daıyndaldy. Budan basqa 26 jańa ottyq daıyndaldy, 50 ottyq jóndeldi, jańa tuzdyqtar jabdyqtaldy, qorektendirý alańdaryn jóndeý jáne qabandarǵa arnalǵan panalar ornatý kózdelgen.
Býrabaı aýdany,
Aqmola oblysy.
