Osydan bastap áýejaı resmı túrde Eýropanyń RA3 derekter bazasyna tirkeldi. Jańa mártebe Eýropa elderine qosymsha tekserýsiz tikeleı júk tasymaldaýdy júzege asyrýǵa jol ashty.
Sonyń nátıjesinde júk jetkizý ýaqyty jedeldep, logıstıkalyq tizbekter jeńildeıdi. Seriktesterdiń ýaqyttyq jáne qarjylyq shyǵyndary azaıady. Odan bólek qalanyń halyqaralyq áýe tasymaldaýshylar men logıstıkalyq kompanııalar úshin tartymdylyǵy arta túsedi.
Shymkent úshin bul oqıǵanyń strategııalyq mańyzy zor. Jańa mártebe áýejaıdyń Ortalyq Azııadaǵy iri júk habtarynyń biri retindegi ornyn nyǵaıtyp, sheteldik áýe kompanııalarymen yntymaqtastyq aıasyn keńeıtedi jáne Qazaqstannyń syrtqy ekonomıkalyq baılanystaryn damytýǵa jańa múmkindikter týǵyzady.
Jalpy RA3 sertıfıkatyn alý – Qazaqstannyń halyqaralyq kólik jáne saýda dálizderine yqpaldasý jolyndaǵy mańyzdy qadam sanalady. Sondaı-aq ol óńirdiń ınvestısııalyq jáne iskerlik tartymdylyǵyn arttyrýǵa yqpal etedi deıdi mamandar.
Sonymen birge Shymkent áýejaıynda ekinshi ushý-qoný jolaǵy salynady. Osylaısha megapolıstiń halyqaralyq áýe aılaǵy zamanaýı kólik-logıstıkalyq habqa aınalady.
Jańa jolaqtyń uzyndyǵy – 3500 metr, eni – 60 metr bolady. PSN-80 sanatyndaǵy tósemniń beriktigi joǵary júk kóterimdi áýe kemelerin qabyldaýǵa múmkindik beredi.
