Foto: Úkimettiń baspasóz qyzmeti
Premer-mınıstrdiń aıtýynsha, Memleket basshysy bıyl jalpy ishki ónimdegi kóleńkeli ekonomıka úlesin 15 paıyzǵa deıin azaıtý mindetin qoıǵan.
«Bul kórsetkishti odan ári tómendete berýge tıispiz. Bizge taza ári ashyq ekonomıka kerek. Kórip otyrǵandaı, bul baǵytta jańa tásilder qolǵa alynyp, júıeli jumys atqarylyp jatyr. Aıtylǵan usynystardy jalpy qoldaımyz. Osy baǵytta barlyq memlekettik organdar men bıznes sýbektileriniń jumysyn kúsheıtý qajet. Bul jumys tek hat-habar almasyp, esep berýmen ǵana shektelmeýge tıis. Ekonomıka jáne salyq turaqtylyǵy, sıfrlandyrý, sondaı-aq bıznes júrgizýdi ońaılatý isinde sapaly ári keshendi sheshimder qajet», dedi Oljas Bektenov.
Sonymen qatar Oljas Bektenov sıfrlandyrýdy strategııalyq mindet dep atap, salalyq mınıstrlikterge bul baǵyttaǵy jumysty kúsheıtýdi tapsyrdy.
«Memleket basshysy Qazaqstan halqyna Joldaýynda jappaı sıfrlandyrý jáne jasandy ıntellekt tehnologııasyn engizý arqyly ekonomıkanyń barlyq salasyn jańǵyrtý qajettigin atap ótti. Bul – strategııalyq mindet. Birqatar sektorda, onyń ishinde saýda, qurylys jáne aýyl sharýashylyǵy salalarynda sıfrlandyrý deńgeıi áli de jetkiliksiz. Barlyq múddeli mınıstrlik óz salasynda jappaı sıfrlandyrýdy qamtamasyz etýi qajet», dedi Premer-mınıstr.
Premer-mınıstr kóleńkeli ekonomıkaǵa qarsy kúres aıasynda Memlekettik kirister komıteti sıfrlandyrý boıynsha kóshbasshy bolýy tıis ekenin basa aıtty.
«Tek júıeli qadamdar ǵana memleket pen bıznes arasyndaǵy qarym-qatynastyń jańa servıstik modelin qurýǵa múmkindik beredi. Sonymen qatar sıfrlyq bastamalardy iske asyrý úshin tıisti resýrstar qajet. Osyǵan baılanysty Jasandy ıntellekt jáne sıfrlyq damý mınıstrligi kelesi jyly Memlekettik kirister komıtetiniń óz aldyna Derekterdi óńdeý ortalyǵyn qurýy kerek», Oljas Bektenov.
