Foto: kaz.inform.kz
Alaıaqtar túrli elderde jol qozǵalysy erejesin buzǵany úshin jalǵan aıyppuldar jibere bastaǵan.
Qaskóıler avtokólik ıelerine elektrondyq poshta nemese messendjerler arqyly hattar men habarlamalar jiberedi. Onda júrgizýshiniń jeke derekteri, kólik nómiri jáne «aıyppuldy tóleýge arnalǵan» silteme qosa jiberiledi. IIM osy mazmundaǵy habarlamalardyń fıshıngtik shabýyl ekenin aıtyp, aıyppuldardy resmı saıttardan tekserýge keńes berip otyr.
«Eger adam bank kartasynyń derekterin engizse, alaıaqtar onyń esepshotyna qol jetkizedi. Keı jaǵdaılarda siltemeler arqyly jeke derekterdi urlaıtyn vırýstar da taralady. Mundaı shabýyldar AQSh pen Reseıde tirkelgen, al endi olardyń Qazaqstanda taralý qaýpi bar», dedi Almaty qalasy PD kıberqylmysqa qarsy kúres basqarmasynyń bastyǵy Ánes Qaldybaev.
Al aıyppuldardy egov.kz, qamqor.gov.kz saıttarynda nemese bankterdiń mobıldi qosymshalary arqyly tekserýge bolady.
Eger kúmándi habarlama kelse:
• siltemelerge ótpeńiz jáne tirkelgen faıldardy ashpańyz;
• aqparatty tek resmı derekkózderden tekserińiz;
• eger karta derekterin engizip qoıǵan bolsańyz – dereý kartańyzdy buǵattap, bankke jáne polısııaǵa «102» nómiri arqyly habarlasý kerek.
