Joba «Saryarqa» magıstraldy gaz qubyrynyń birinshi kezeńi aıasynda iske asyryldy. Ybyraı Altynsarın atyndaǵy aýylda 51 shaqyrym jáne Talapkerde 154 shaqyrym - jalpy 205 shaqyrym jeli tartyldy. 3,8 myń úı sharýashylyǵynda turatyn 13,8 myń turǵynǵa kógildir otyn berýdi qamtamasyz etetin 27 shkaftyq pýnkt ornatyldy.
Aqmola oblysynyń ákimi Marat Ahmetjanov gazdandyrý – bul jaı ǵana ınjenerlik joba emes, adamdardyń ómir súrý sapasyn arttyrýǵa baǵyttalǵan mańyzdy qadam ekenin atap ótti.
«Halyqty tabıǵı gazben qamtamasyz etý – negizgi ınfraqurylymdyq jobalardyń biri. Gaz aýyldardy yńǵaıly etedi, ekologııaǵa júktemeni azaıtady jáne shaǵyn bıznes úshin jańa múmkindikter ashady. Bıyl Selınograd aýdanynda taǵy tórt aýyl – Qoıandy, Qyzylsýat, Qarajar jáne Qaraótkel gazdandyrylady. Qoıandyda jumystar aıaqtalýda. Jobalardy iske asyrǵannan keıin taǵy 21 myńǵa jýyq aqmolalyq «kógildir otyndy» paıdalana alady», – dep atap ótti Marat Ahmetjanov.
Halyqtyń áleýmettik osal sanattary úshin qosymsha qoldaý sharalary qarastyrylǵan. Tabysy tómen otbasylar gaz tólemine 20%-ǵa deıin jeńildik alady, al eń tómengi kúnkóris deńgeıinen tómen kirisi bar azamattarǵa 70 aılyq eseptik kórsetkish mólsherinde kómek kórsetiledi.
О́ńirde 966 shaqyrym gaz taratý jelileri «Qazaq Gaz Aimaq» AQ-nyń senimgerlik basqarýyna berildi. Kompanııanyń Astana fılıalynyń ókili Ýálıhan Qymbatov oblysta gazdandyrý kezeń-kezeńimen júrip jatqanyn jáne barǵan saıyn kóp eldi mekendi qamtyp otyrǵanyn aıtty:
«Aqmola oblysynda úılerdi tabıǵı gazǵa qosý boıynsha aýqymdy jumystar jalǵasýda. Búgin Altynsarın jáne Talapker aýyldary «kógildir otynǵa» qosylýda. Qazirgi ýaqytta 112 tutynýshy gaz aldy, jáne biz halyqtyń qýanyshyn kórip otyrmyz. Adamdar úshin bul jaı ǵana yńǵaılylyq emes, bul – ómirdiń jańa deńgeıi. Biz gaz ár úıge jetýi úshin júıeli jumys júrgizýdi jalǵastyramyz», – dep atap ótti ol.
Jergilikti turǵyndardyń aıtýynsha, gazdyń iske qosylýy –ómirdi jaqsartatyn, kópten kútken oqıǵa.
«Biz bul kúndi kópten kúttik. Endi úıler jyly bolady, al ómir – jeńildeıdi. Kómir men otyn jınaýdyń qajeti joq, bári áldeqaıda yńǵaıly boldy. Aýyl kóz aldymyzda ózgerip jatyr, jáne bul bolashaqqa senim uıalatady», – dep bólisti zeınetker Iman Qaıbaǵarov.
Búgingi tańda Aqmola oblysynda Arshaly jáne Selınograd aýdandarynda, sondaı-aq Qosshy qalasynda 21 eldi meken gazǵa qosylǵan. Ortalyqtandyrylǵan gazben 79 myńǵa jýyq turǵyn qamtamasyz etilgen. Bıyl taǵy on joba iske asyrylýda, olar 178 myń adamnyń ómir súrý jaǵdaıyn jaqsartady. 2026 jylǵa qaraı alty jańa nysannyń – Qaraótkel, Qyzylsýat, Qarajar, Aqbulaq, Taıkól aýyldarynda, sondaı-aq Qosshy qalasyndaǵy eki iske qosý keshenniń qurylysyn aıaqtaý josparlanýda.
Bolashaqta tabıǵı gaz oblystyń soltústik aýdandarynda da paıda bolady. Gazdandyrýdyń jańartylǵan syzbasyna sáıkes, «Saryarqa» magıstraldyq gaz qubyrynyń Astana – Kókshetaý – Petropavlovsk baǵyty boıynsha ekinshi jáne úshinshi kezeńderiniń qurylysy 2028 jylǵa josparlanǵan. Bul kezeńder aıaqtalǵannan keıin 400 myńnan astam adam turatyn 165 eldi meken gazǵa qosylady.
