Jalpy aýdany 612 sharshy metrdi quraıtyn jańa medısınalyq pýnkt Eńbek aýylynyń jáne Alataý qalasynyń irgeles aýmaqtaryndaǵy 900-ge jýyq turǵynǵa qyzmet kórsetedi. Munda feldsher, akýsher, sanıtar jáne kúzetshi jumys isteıdi. Ǵımarat zamanaýı medısınalyq qural-jabdyqtarmen qamtamasyz etilip, naýqastardy qabyldaýǵa jáne medısına qyzmetkerleriniń jumys isteýine barlyq jaǵdaı jasalǵan.
Jańa FAP-tyń ashylýy aýyl turǵyndaryna ýaqytyly ári sapaly alǵashqy medısınalyq kómek alý múmkindigin keńeıtedi.
Oblys ákimdigi taratqan aqparatqa sáıkes, osyndaı jobalardyń júzege asyrylýy aýyldyq jerlerdegi medısınalyq qyzmetterdiń qoljetimdiligin arttyryp, alǵashqy medıko-sanıtarlyq kómek júıesin nyǵaıtýǵa jol ashady.
«Biz memleketke qaıtarylǵan aktıvterdiń naqty nátıjesin kórip otyrmyz. Bul qarajattar áleýmettik mańyzy bar jobalarǵa baǵyttalyp jatyr. Eńbek aýylyndaǵy jańa FAP – osynyń jarqyn mysaly. Qaıtarylǵan resýrstar halyq ıgiligine jumsalyp, jergilikti ómir sapasyn arttyrýǵa qyzmet etýde», – dedi Almaty oblysynyń ákimi Marat Sultanǵazıev.
Nysannyń qurylysy Almaty oblysynyń qurylys basqarmasynyń tapsyrysy boıynsha júrgizilip, «ASK AýylQurylysy» JShS merdiger uıymy tarapynan salyndy.
Aımaqta mundaı bastamalar aýyldyq ınfraqurylymdy damytýǵa jáne oblys turǵyndaryna kórsetiletin medısınalyq qyzmet sapasyn arttyrýǵa baǵyttalǵan mańyzdy qadam retinde baǵalanyp otyr.
Almaty oblysy.
