Foto: Erlan Omar
Aıta keteıik, qoldanystaǵy zańnamaǵa sáıkes, jumystan bosatylǵan azamattar mindetti áleýmettik saqtandyrý júıesine qatysý ótili men sońǵy 24 aıdaǵy tabysyna qaraı 1 aıdan 6 aıǵa deıin áleýmettik tólem ala alady. Bul tólem joǵaltqan tabystyń 45 paıyzynan aspaıdy jáne tolyqtaı MÁSQ qarajaty esebinen júzege asyrylady.
Jumyssyz qalǵan azamat tólem alý úshin aldymen eGov.kz portalyna kirip, avtorızasııadan ótedi. «Jumysqa ornalastyrý jáne jumyspen qamtý» bóliminen «Jumys izdeýshi adamdardy tirkeý» qyzmetin tańdap, ótinimdi toltyryp, elektrondyq sıfrlyq qoltańba arqyly jiberý qajet.
О́tinim jiberilgennen keıin bir kún ishinde mansap ortalyǵy tıisti jumys oryndaryn usynady. Eger laıyqty jumys tabylmasa, úsh jumys kúni ishinde azamatqa onlaın formatta jumyssyz mártebesi beriledi. Qajet bolǵan jaǵdaıda ortalyq qyzmetkeri qosymsha aqparat alý úshin habarlasady.
Azamattar bul qyzmetti Elektrondyq eńbek bırjasy – enbek.kz platformasy arqyly da rásimdeı alady.
Jumyssyz mártebesi tirkelgen soń, Eńbek jáne halyqty áleýmettik qorǵaý mınıstrliginiń aqparattyq júıesi avtomatty túrde MÁSQ tólemin taǵaıyndaý prosesin bastaıdy. Azamattyń mobıldi nómirine SMS-habarlama jiberilip, tólemge kelisim suralady. SMS arqyly rastaý jiberilgennen keıin tólem avtomatty túrde taǵaıyndalady.
Mınıstrlik ókilderi atap ótkendeı, MÁSQ qarajaty esebinen beriletin bul áleýmettik tólem jumystan shyǵý sebebine qaramastan júzege asyrylady jáne azamatqa jańa jumys izdeý kezeńinde qarjylaı qoldaý kórsetýge baǵyttalǵan.
