Qolónerdi serik etken Aıajan kishkentaıynan sýret ónerine jaqyn bolǵan. Dızaıner bolamyn degen sol kezdegi bala armany adastyrmaǵan eken. Áýelde qoly qalt etse, muǵalimder úshin kórneki aqparat quraldaryn jasaıtyn. Keıin syılyqtyń qoraptaryna kóshti. Túrli órnektegi qoraptarǵa degen tapsyrys ústi-ústine túsken. Ideıalardy kóbinese áleýmettik jeliden izdedi. Halyqqa ne keregin zerttedi. Zertteı júrip ónerin ushtady. Zamannyń talabyna qaraı tehnıka qoldana bastady.
«Eń aldymen tabys tabýdy kózdemedim. О́zime qyzyqty, janyma jaqyn ispen aınalysqym keldi. Bir kúni kishkentaı sińlimdi oınatyp otyryp, damytýshy oıynshyqtardy nege ózimiz jasamaımyz degen oı keldi. Sóıtip, úı jaǵdaıynda logıkalyq suraqtarǵa toly oıynshyqtar jasaı bastadym. Álgi oıynshyqtarǵa ata-analar ǵana emes, balabaqsha tárbıeshileri de qyzyqty», deıdi jas kásipker Aıajan Qýatbekqyzy.
Sóıtip kompıýterli grafıka arqyly syzbasyn syzyp, túrli-túrli damytýshy oıynshyqtar jasap sata bastaǵan. О́ziniń uly tárbıelenip jatqan balabaqsha tárbıeshilerimen birlese otyryp, búldirshin qyzyǵatyn oıynshyqtardy zertteı túsken.
«Ne istesek te ultqa tamshydaı bolsyn paıdamyz tıse deımin. Sol ustanymmen qazaqı naqyshta qaıtalanbaıtyn oıyndar jasap bastadym. Ony áleýmettik jeli arqyly jarnamaladym. О́zimizdiń óńirdi qoıyp, Atyraý, Aqtaýdan tapsyrys tústi», deıdi jas kásipker sehtaǵy tańǵy jumysyna kirisip jatyp.
Qarap otyrmyz, áp-sátte arnaıy materıaldan asyq oıyp shyǵara qoıdy. Kádimgi qoıdyń asyǵynan aýmaıdy. Tapsyryspen alǵyzatyn shıkizaty sertıfıkattalǵan, balaǵa esh zııany joq. Shaǵyn sehynda qazirgi sharýaǵa qajetti prınterdiń túr-túri bar. Biri bylǵaryǵa oıý bassa, endi biri túrli oıynshyq oıady. Bári avtomattandyrylǵan. Kompıýterdegi syzba boıynsha buıryqty oryndaı beredi. IT salasyna jany jaqyn Aıajan Qýatbekqyzy bul baǵytta jasandy ıntellekt arqyly da jobalar jasaýdy oılap otyr. Iá, jospar kóp. Tek qarjy qolbaılaý. Sonyń ózinde úsh adamdy jumyspen qamtyp otyr.
«Biz de tehnıka tilin meńgerip aldyq. Shyǵarmashylyq jumys bolǵandyqtan, asqan qyzyǵýshylyqpen isteımiz. Erteńgi kúni qazaqstandyq brend oıynshyqtar shyǵaryp jatsaq, ol bizdiń úlken jetistigimiz bolar edi», deıdi seh qyzmetkeri Janna Qashqynbaeva.
Shaǵyn ujym oıynshyqtardan bólek balabaqsha, mektepterde bezendirý jumystarymen de aınalysady. Eger memleket tarapynan qandaı da kómek bolsa, kásip keńeıip, násiptiń de artary anyq. Aıajan Qýatbekqyzy jýyqta «Táýelsizdik urpaqtary» grantyna ótinim bergen. Eger kásibi talaptarǵa saı kelip, maquldansa, 3 mln teńgege ıe bolady. Ol qarjyny qazaq ertegilerin dáripteıtin oıyndar jasaýǵa jumsaıtynyn aıtady kásipker.
Ras, ulttyq dástúrimizdiń jańǵyrýyna, jandanýyna bir kisideı at salyssaq, kúni erteń-aq ala-shubar tilden qutylyp, táı-táı basqan búldirshinderdiń tili tek ana tilinde shyǵady. Áıtpegende, telefonǵa telmirgen bala ózgeniń tilinde sóılep, ózgeniń tálimin sińirip jatqan joq pa?! Ol úshin Aıajannyń asyǵy alshysynan túsýi kerek.
Shyǵys Qazaqstan oblysy,
Glýbokoe aýdany
