Baǵany turaqtandyrý maqsatynda ákimdiktiń turaqtandyrý qorynda 22 myń tonna áleýmettik mańyzy bar azyq-túlik qory qalyptastyrylǵan. Áleýmettik mańyzy bar azyq-túlik taýarlaryn halyqqa qoljetimdi etý maqsatynda oblysta 39 áleýmettik dúken qyzmet etedi. Bul dúkenderde áleýmettik mańyzy bar azyq-túlik baǵalary naryqtyq baǵadan 15-20% tómen saýdalanyp jatyr. Sonymen qatar ár apta saıyn oblys aýmaǵynda jármeńkeler uıymdastyrylyp, tikeleı aýyl sharýashylyǵy taýaryn óndirýshilerdiń qatysýymen ónimder naryqqa deldalsyz jetkizilýde. Nátıjesinde, tutynýshylar azyq-túlik taýarlaryn naryqtyq baǵadan 20-30% tómen baǵada satyp alýda.
Ákimdik tarapynan et óndiretin sharýalarǵa arnaıy qarjylaı qoldaý kórsetý arqyly sıyr etiniń bir kılosy bazarlarda 2 600 teńgeden saýdalanyp jatyr. Jalpy, statıstıkalyq derekterge sáıkes, Túrkistan qalasynda áleýmettik mańyzy bar tuz, kúnbaǵys maıy, sıyr eti, sary maı, qant, jumyrtqa jáne kókónis ónimderiniń baǵasy elimizdegi eń tómen baǵalar qatarynda.
Odan bólek, «Bereke Fest» aksııasy bastalyp, saýda jelilerinde baǵanyń ósýin tejeý jáne tómendetý maqsatynda saýda ústemesi 10%-dan aspaýǵa tıis degen shartpen mindetti memorandýmdar jasaldy. Atalǵan aksııa barysynda qala aýmaǵyndaǵy 14 sýpermarketpen arnaıy memorandýmdar túzildi. Qaladaǵy saýda jelilerindegi baǵa ústemesin qadaǵalaý maqsatynda jumys toptary turaqty monıtorıng jumystaryn júrgizýde.
