Sarlyq aýylyna kirer tustaǵy 9,6 shaqyrymdyq avtokólik jolyna ortasha jóndeý jumysy júrgizildi. Atalǵan joba oblystyq jáne aýdandyq bıýdjet esebinen qarjylandyrylyp, belgilengen jumys kestesine sáıkes júzege asty. Joldy tegisteý jumysy júrgizilip, asfalt jabyndysy tóseldi.
Osy jol – Altyn Shoqy, Han Ordasy syndy kıeli tarıhı oryndarǵa aparatyn negizgi baǵyttyń bir bóligi. Joldyń jańartylýy týrızmdi damytýǵa, óńirdiń tarıhı-mádenı áleýetin keńinen tanytýǵa jáne jol qozǵalysynyń qaýipsizdigin qamtamasyz etýge múmkindik beredi.
Budan bólek, aýdan ortalyǵyna irgeles ornalasqan Aıyrtaý eldi mekenine aparatyn 5,5 shaqyrymdyq kireberis jolda da ortasha jóndeý jumysy júrgizilip jatyr. Qurylys barysynda eski jol jabyndysy sýyq frezerleý ádisimen alynyp tastalyp, jańadan sý ótkizý qubyrlary ornatyldy. Jol ústine qıyrshyq tas tóselip, tegisteý jumystary aıaqtaldy. Qazirgi tańda 700 metr jol ýchaskesine asfalt tóseý jumysy qarqyn aldy. Tegistelgen jolǵa tolyq asfalt jabyndysyn tóseý jumystary kestege sáıkes 2026 jyly aıaqtalady.
Sonymen qatar, Ulytaý aýylyndaǵy «Rámizder alańyna» deıingi 0,25 shaqyrymdyq kóterme jol jańadan salyndy. Jol jabyny jartas topyraǵymen nyǵyzdalyp, sý tasqynynyń aldyn alý úshin uzyndyǵy 11 metr bolatyn eki núkteli sý ótkizgish qubyrlar ornatyldy.
Atalǵan joba aıasynda alań mańyndaǵy 350 sharshy metrdi qamtıtyn avtoturaqqa asfalt tóseldi.
Ulytaý oblysy
