Úsh kúndik is-shara Prezıdent Qasym-Jomart Toqaevtyń sý resýrstaryn utymdy paıdalaný, azyq-túlik qaýipsizdigin qamtamasyz etý jáne klımattyq turaqtylyqty arttyrýǵa baǵyttalǵan ulttyq reformalary aıasynda, Sý resýrstary jáne ırrıgasııa mınıstrligi Islam yntymaqtastyǵy uıymynyń Azyq-túlik qaýipsizdigi jónindegi uıymymen (AQIU) birlese jáne Islam damý bankiniń (IsDB) qoldaýymen ótkizilip otyr. Uıymdastyrýshylardyń aıtýynsha bul bastama Prezıdent Q.Toqaev aıqyndaǵan basty strategııalyq basymdyqtardy – Sý kodeksin reformalaý, 2025-2029 jyldarǵa arnalǵan Ulttyq damý jospary men Sý qaýipsizdigin qamtamasyz etý jónindegi ulttyq jobany iske asyrýǵa baǵyttalǵan. Negizgi nazar – ırrıgasııalyq ınfraqurylymdy jańǵyrtýǵa, sý resýrstaryn basqarýdy sıfrlandyrýǵa jáne óńirlik yntymaqtastyqty nyǵaıtýǵa aýdarylǵan.
Senattyń Agrarlyq máseleler komıtetiniń tóraǵasy Álı Bektaev sý resýrstary tek strategııalyq emes, sonymen qatar klımattyń ózgerýi men transshekaralyq táýeldilik jaǵdaıynda asa osal resýrs ekenin erekshe atap ótti.
«Prezıdent aıtqandaı «Sý – únemdep paıdalanbasa, tez taýsylatyn shekteýli resýrs». Sý resýrstaryn tıimdi ári ashyq basqarý, sıfrlyq tehnologııalardy engizý jáne bilikti mamandardy daıarlaý – Memleket basshysy belgilegen mańyzdy baǵyttar, olar búginde beıindi mınıstrlikti qurý, jańa Sý kodeksin qabyldaý jáne sýarý júıelerin avtomattandyrý boıynsha keń aýqymdy jobalar arqyly naqty iske asyrylyp jatyr. Irrıgasııa jáne sý resýrstaryn basqarý salasyndaǵy sıfrlandyrý – bul jaı ǵana tehnologııalyq úrdis emes, aýyl sharýashylyǵy men jalpy ekonomıkanyń ornyqty damýyna qajetti naqty qadam», dedi senator.
Sondaı-aq AQIU Bas dırektorynyń orynbasary, elshi Hýsrav Nozırı óńirdegi sý qaýipsizdigi men azyq-túlik turaqtylyǵyna qol jetkizýde sıfrlyq transformasııanyń sheshýshi róline toqtaldy.
Al AQIU jobalar departamentiniń dırektory Ismaıl Abdelhamıd uıymnyń Qazaqstan men óńirlik seriktesterdi klımatqa tózimdi, sıfrlyq agroazyq-túlik júıelerin qalyptastyrýda qoldaýǵa árqashan daıyn ekenin aıta otyryp, bul baǵyt Memleket basshysy Q.Toqaev aıqyndaǵan damý baǵytyna jáne memlekettik jańǵyrtý baǵdarlamasyna tolyq sáıkes keletinin atap ótti.
Trenıng aıasynda Túrkııanyń Memlekettik gıdrotehnıkalyq qurylystar basqarmasy (DSİ) SUTEM sıfrlyq monıtorıng platformasyn, al О́zbekstannyń Sý sharýashylyǵy mınıstrligi SRBISA derekterge negizdelgen sýarý júıesin tanystyrǵan arnaıy tehnıkalyq sessııalar ótkizdi.
«Qazvodhoz», Sý resýrstary jónindegi aqparattyq-taldaý ortalyǵy jáne óńirlik ákimdikterdiń ulttyq sarapshylary sý bólýdi ońtaılandyrý, spýtnıktik monıtorıng jáne sıfrlyq esep júrgizý boıynsha praktıkalyq tásildermen bólisti.
Sarapshylar sý resýrstaryn basqarýda sıfrlyq tehnologııalardy keńinen qoldanyp, ırrıgasııa salasyndaǵy saıasat pen ınvestısııalyq tetikterdi úılestirý qajet ekenin aıtty. Buǵan qosa transshekaralyq sý paıdalanýda óńirlik derekter men ozyq tájirıbemen almasyp, kadrlyq áleýetti damytý jáne mamandardyń kásibı quzyrettiligin arttyrý qajet ekenin jetkizdi.
