Senat tóraǵasy Máýlen Áshimbaev bıyl Táýelsizdikke jol ashqan jáne memlekettik qurylymnyń mańyzdy qaǵıdattaryn bekitken tarıhı qujat – Egemendik týraly deklarasııanyń qabyldanǵanyna 35 jyl tolyp otyrǵanyn aıtyp, Respýblıka kúniniń mańyzyna nazar aýdardy.
«Bıyl Egemendik týraly deklarasııanyń qabyldanǵanyna 35 jyl tolyp otyr. Bul qujat elimizdiń derbes memleket retindegi saıası jáne quqyqtyq negizin bekitti. Qazaqstan ózin terrıtorııasy bólinbeıtin birtutas memleket retinde jarııalady. Sondyqtan Respýblıka kúni aıryqsha tarıhı mańyzǵa ıe. Ulttyq merekemiz – egemendigimizdiń nyshany jáne ǵasyrlarmen ólshenetin memlekettiligimizdiń qaıta jandanýynyń jarqyn kórinisi. Búginde bul kún jańa mazmunmen tolyǵyp, ulttyq biregeılikti nyǵaıta túsetin merekege aınaldy», dedi M.Áshimbaev.
Sonymen qatar Senat tóraǵasy Memleket basshysy Joldaýda belgilep bergen reformalardy sapaly iske asyrýdyń mańyzdy ekenin aıtyp, palatanyń osy baǵyttaǵy jumys baǵdaryna toqtalyp ótti.
«Prezıdent Qasym-Jomart Toqaev bıylǵy Joldaýynda sıfrlyq kún tártibin ilgeriletýge jáne jasandy ıntellektini keńinen qoldanýǵa basa mán berdi. Basty maqsat – jańa tehnologııalar arqyly azamattardyń ál-aýqatyn arttyrý, olardyń ómir súrý sapasyn jaqsartý jáne eldiń básekege qabilettiligin nyǵaıtý. Bul Ádiletti Qazaqstan qurý jolyndaǵy strategııalyq baǵdardyń logıkalyq jalǵasy ekeni sózsiz. Olardyń sapaly ári ýaqtyly oryndalýyn zańnamalyq turǵydan qamtamasyz etý jolynda Parlament Senaty belsendi qyzmetin ári qaraı da jalǵastyra beredi», dep M.Áshimbaev áriptesterin Respýblıka kúnimen quttyqtady.
Sondaı-aq Senat tóraǵasy Memleket basshysynyń tapsyrmasymen birqatar senator men apparat qyzmetkerlerine memlekettik nagradalardy saltanatty túrde tapsyrdy. Naqty aıtqanda, Memleket basshysynyń Jarlyǵymen senatorlar Súıindik Aldashev, Janna Asanova jáne Altynbek Nýhuly «Parasat» ordenimen marapattaldy. Senat depýtaty Nurlan Bekenov pen Senat apparatynyń bas konsýltanty Serik Qarajan «Qurmet» ordenimen, Senat apparatynyń bólim basshylary Almas Danııarov pen Eldos Saılaýhan jáne Senat apparatynyń sektor meńgerýshileri Záýre Ýashova men Raýshan Bazarova «Eren eńbegi úshin» medalimen nagradtaldy. Sonymen qatar birneshe depýtatqa halyqaralyq parlamentaralyq uıymdardyń marapattary tabystaldy.
