Foto: Ashyq derekkózden
Ol Densaýlyq saqtaý mınıstri Aqmaral Álnazarovaǵa MÁMS júıesindegi medısınalyq qyzmetterdiń qoljetimdiligin arttyrý jóninde saýal joldap, salaǵa qatysty qazaqstandyqtardyń narazylyǵyn týdyratyn negizgi máselelerdi atady.
«MÁMS paketine kiretin qyzmetter, onyń ishinde dárigerlik keńester, konsýltasııalyq-dıagnostıkalyq qyzmetter qoldan, jasandy jolmen qıyndatylyp, tipti shektelip jatyr. Buǵan azamattar men medısınalyq qaýymdastyqtardan kelip túsken habarlamalar dálel bola alady. Atap aıtqanda PSR, IFA, KT jáne MRT syndy tekserýlerdi jasatý úshin túrǵyndar aptalap keıde birneshe aı boıy kezek kútýge májbúr. Al mundaı kúrdeli dıagnozdardyń nátıjesi 10 kúnnen artyqqa jaramaıtyny taǵy belgili. Nátıje sol, 10 kúnnen asyp ketse Áleýmettik medısınalyq saqtandyrý qory qorytyndyny bergen medısınalyq uıymǵa aıyppul salýy da múmkin. Bul qanshalyqty qısyndy bolmaq», dedi Nurlan Áýesbaev.
Depýtat azamattarymyzdyń densaýlyǵyn ońaltý kezinde týyndaıtyn bıýrokratııalyq is-áreketterdi synap, konsýltatıvtik-dıagnostıkalyq qyzmetterge qoljetimdilikti júıeli shekteý medısınalyq qyzmetterdiń sapasynyń tómendeýine yqpal etetinin atap aıtty. Ol osy máselelerdi ońtaıly sheshý úshin birshama usynysyn jetkizdi.
«Birinshi, «Búgin jáne qazir» qaǵıdatyna saı qoljetimdilikti qamtamasyz etý úshin kórsetilgen qyzmetterge negizdelgen tólemge kóshýdi qamtamasyz etý. Ekinshi, medısınalyq uıymdardyń kredıtorlyq bereshegin óteýdi tolyq jáne ýaqtyly qarjylandyrý. Úshinshi, salany sıfrlandyrýdy jáne barlyq medısınalyq aqparattyq júıelerdi ıntegrasııalaýdy kúsheıtý. Tórtinshi, eger taǵaıyndalǵan klınıkada tıisti qyzmet 10 kúntizbelik kún ishinde kórsetpese, keshendi medısınalyq kómek kórsetýdi basqa medısınalyq uıymǵa esh kedergisiz aýystyrý. Besinshi, eger pasıent memlekettik klınıkada qyzmet ala almaǵan jaǵdaıda jeke klınıkada emdelýge jiberý múmkindigin qarastyrý jáne osy pasıentke Mindetti medısınalyq saqtandyrý qorynan shyǵyndy óteý múmkindigin júıeleýdi qarastyrý», dedi depýtat.
