Mereke aıasynda jasalǵan ıgilikti is-sharada aǵa aımaq basshysy Berik Ýálı qala turǵyndaryn Respýblıka kúnimen quttyqtap, jańa saıabaq shahardyń áleýmettik jáne mádenı kelbetin aıshyqtaıtyn mańyzdy nysan ekenin jetkizdi.
«Memleket basshysy Qasym-Jomart Toqaev Respýblıka kúnine arnalǵan quttyqtaýynda: «Táýelsizdik – bárinen qymbat qundylyǵymyz. Ony saqtap, nyǵaıta túsý – barshamyzǵa ortaq qasıetti borysh. Egemendik – ata-babalarymyzdyń ult múddesi jolyndaǵy óshpes erliginiń aıqyn kórinisi», dep egemendiktiń qadir-qasıeti men mańyzyn halqymyzdyń san keshýli tarıhy men kúreske toly kezeńderin eske alyp, naqty túıindedi. Biz búgin Semeıdiń ajaryna kórik qosyp, tarıhı sypatyn baıyta túsetin ózgeshe nysandy Respýblıka kúnine oraılastyryp, Semeı turǵyndarynyń qajetine paıdalanýǵa bergeli otyrmyz. Bul qala turǵyndarynyń demalyp, serýendeýine arnalǵan jańa saıabaq, jańa alań bolmaq. Saıabaqtyń bıikten túsirilgen sýretin qaraǵanda kıiz úıdiń beınesi bederlengen. Aldaǵy ýaqytta biz osy jerge memlekettik rámizimiz – Týymyzdy ornatatyn bolamyz. Qalamyz kúnnen kúnge kórkeıip keledi. Ushaqtar kentinde de osyndaı saıabaq salynyp jatyr. Ony da tolyq aıaqtap, halyqtyń demalys ornyna, qoǵamdyq keńistikke aınaldyramyz», dedi oblys ákimi.
Sonymen qatar ákim jańa ashylǵan saıabaqqa «Respýblıka saıabaǵy» degen atý berý kerektigin de aıtty.
«Qalamyzdyń kórkin asyryp, halyq ıgiligine qyzmet etetin saıabaqty qala zııalylary men qoǵamdyq keńes ókilderi «Respýblıka alańy», «Respýblıka saıabaǵy» dep ataýdy usynyp otyr. Men óz tarapymnan bul ataýdyń jańa qoǵamdyq orynǵa jarasymdy ekenin aıtqym keledi. О́ıtkeni, elimizdiń eń ulyq merekesi Respýblıka kúninde halyq ıgiligine paıdalanýǵa berilip otyr. Azamattardyń usynysyn qoldaı otyryp, Memlekettik onomastıka komıssııasyna osylaı usynatynymyzdy jetkizgim keledi», dedi ol.
Búginde jańa saıabaqtyń qurylysy tolyq aıaqtalyp, aýmaǵy keń kólemde abattandyrylǵan. Kógaldandyrý jumystary aıasynda myńǵa jýyq qaraǵaı men shyrsha kóshetteri, 9 500-den astam sándi butalar men 8 000-ǵa jýyq kópjyldyq gúlder egildi. Jalpy aýmaǵy shamamen 53 myń sharshy metrdi quraıtyn saıabaqta serýen joldary, demalys aımaqtary, sahna jáne mádenı-kópshilik is-sharalarǵa arnalǵan ashyq alańdar qarastyrylǵan.
Az ýaqyt ishinde boı kótergen qoǵamdyq nysan turǵyndardyń jaıly ári qaýipsiz demalatyn oryn. Saıabaqty salý barysynda 24 myń sharshy metr aýmaq kógaldandyrylyp, 20 370 sharshy metr jerge brýschatka tas tóseldi. Sondaı-aq 20 480 sharshy metr aýmaqqa asfalt tóseldi. Saıabaqtyń basty nysandarynyń biri – qazaq halqynyń rýhanı murasy men táýelsizdiktiń sımvolyna aınalǵan Altyn adam eskertkishi. Bul eskertkish ulttyq tarıhqa taǵzym retinde ornatylyp, saıabaqtyń kórkin aıshyqtap tur. Sonymen qatar jıynǵa qatysqan qala turǵyndary saıabaqtyń ashylǵanyna rızashylyqtaryn jetkizdi.
«Búgin nemerelerimdi ertip, jańa saıabaqqa keldik. Buryn bul jaq bos jer bolatyn, al qazir osyndaı ádemi, jaıly demalys orny boldy. Aınalasy jasyl jelekke toly, balalarǵa arnalǵan oıyn alańdary men Altyn adam eskertkishi erekshe kórik berip tur. Otbasymen serýendep, demalýǵa taptyrmas oryn», dedi Qaraǵaıly yqsham aýdanynyń turǵyny Nurlybek Qalıuly.
Saltanaty jıyn sońynda «Alataý serileri» toby, Ámire Qashaýbaev atyndaǵy oblystyq fılarmonııa ánshileri óner kórsetip, jınalǵan qaýymǵa kóterińki kóńil-kúı syılady.
Abaı oblysy
