Foto: OKQ
Naqty ataǵanda, osy jylǵy jol-qurylys maýsymynda 9500 shaqyrym respýblıkalyq mańyzy bar avtojoldardan – 2900 shaqyrym jolda qaıta jańartý jáne qurylys jobalary, 460 shaqyrym jolda kúrdeli jóndeý, 5100 shaqyrym jolda ortasha jóndeý jumystary júrgizilgen. Jyl bastalǵaly 2 myń shaqyrymda jumystar aıaqtalyp, qoldanysqa berilgen.
Spıkerdiń aıtýynsha, bıylǵa josparlanǵan mańyzdy jobalardyń biri – «Qalbataý-Maıqapshaǵaı» avtojolynyń qaıta jańartý jumystary aıaqtalyp, 415 shaqyrym jolda qozǵalys ashylyp otyr.
«Qarasha aıynyń basynda Aqtóbe oblysynda I sanattaǵy «Aqtóbe-Qarabutaq-Ulǵaısyn» ýchaskesiniń 28 shaqyrymdyq bóligin ashamyz. Qyzylorda oblysynda II sanattaǵy «Qyzylorda-Jezqazǵan» avtojolynyń uzyndyǵy 192 shaqyrymdyq ýchaskesi paıdalanýǵa beriledi. Al Ulytaý oblysynda «Qyzylorda-Jezqazǵan» jobasy aıasynda 40 shaqyrym jol salyndy», dedi D.Imanashev.
Sondaı-aq, Almaty oblysynda uzyndyǵy 67 shaqyrymdy quraıtyn I sanattaǵy «Qurty-Qapshaǵaı» ýchaskesiniń qaıta jańartý jumystary aıaqtalyp, paıdalanýǵa berilmek.
