Foto: freepik
QMA baspasóz qyzmeti málim etkendeı, alaıaqtyq isti uıymdastyrýshylar ýaqytsha jumys usynǵan túr tanytyp, jastarǵa ekinshi deńgeıli bankterde óz atyna shot ashýdy usynǵan.
«Internet-bankıng mobıldi qosymshalaryn alaıaqtardyń qurylǵylaryna ornatqannan keıin, shottarǵa qol jetkizý tolyqtaı olardyń baqylaýyna ótken. Osyndaı áreketterge qatysqan tulǵalar, ıaǵnı «dropperler», 200-den 350 AQSh dollaryna deıin syıaqy alǵan. Bul shottar arqyly ınternet-alaıaqtyq qurbandarynan túsken qarajat aýdarylyp otyrǵan», delingen habarlamada.
Agenttik dereginshe, zańsyz operasııalardyń jalpy kólemi 17 mıllıon teńgeden asqan.
«Oqıǵalardyń birinde banktik karta buǵattalǵannan keıin, bir dropper zańsyz áreketterge ári qaraı qatysýdan bas tartqan. Qylmystyq top músheleri oǵan kúsh qoldanyp, qorqytyp, shotqa qaıta qoljetimdilikti qalpyna keltirýdi talap etken», dep málim qyldy QMA baspasóz qyzmeti.
Búginde atalǵan qylmystyq istiń uıymdastyrýshysy kúdikti retinde ustalyp, qamaýǵa alynǵan.
«Tergeý jalǵasyp jatyr. О́zge aqparat Qylmystyq-prosestik kodeksiniń 201-babyna sáıkes jarııa etilmeıdi», delingen resmı habarlamada.
Aıta ketelik, bıyl 16 qyrkúıekten bastap Qylmystyq kodekske engizilgen jańa 232-1-bap dropperlikke – banktik shotqa, tólem quralyna nemese jeke sáıkestendirý tásiline zańsyz qol jetkizýdi berý, satý ne satyp alýǵa – qylmystyq jaýapkershilik belgileıdi.
Atalǵan bap – jaza retinde múlkin tárkileı otyryp, 7 jylǵa deıin bas bostandyǵynan aıyrýdy qarastyrady.
