Foto:Ashyq derekkóz
«Bári qaıtarǵan joq. Bizde 6 bankte osyndaı memlekettik kómek bolǵan. Halyk Bank pen SentrKredıt Banki bul qarajatty tolyq qaıtardy. Taǵy eki bank ishinara ótedi. Al tórt bankte memlekettik kómek áli bar», dedi agenttik tóraǵasy.
Mádına Ábilqasymovanyń aıtýynsha, qazirgi tańda Alataý Sıtı Bankinde – 950,2 mlrd teńge, RBK Bankte – 176,8 mlrd teńge, Eýrazııalyq bankte – 150 mlrd teńge, al Nurbankte 46,8 mlrd teńge kóleminde qaryz qaldyqtary bar. Bul qarajattar bankterdiń qarjylyq turaqtylyǵyn qamtamasyz etý maqsatynda Ulttyq bank tarapynan rettelgen oblıgasııalar túrinde berilgen.
«Bul memlekettik bıýdjet qarajaty emes, respýblıkalyq bıýdjetten bólingen aqsha emes. Sondyqtan bankter bul qaryzdaryn bıýdjetke emes, Ulttyq bankke qaıtarady», dep túsindirdi M. Ábilqasymova.
Agenttik basshysy bankterdiń qaryzdy tezirek óteýi úshin birqatar sharalar qabyldanǵanyn aıtty.
«Biz Ulttyq bankpen birlesip, dıvıdend tóleýge shekteý qoıdyq. Sondaı-aq mınımaldy rezervtik talaptar 10%-ǵa deıin kóterildi. Osy qadamdar bankterdi memlekettik qoldaý qarajatyn merziminen buryn qaıtarýǵa yntalandyrady», dedi Ábilqasymova.
Onyń aıtýynsha, jyl sońyna deıin taǵy bir bank qaryzyn tolyq óteıdi, endi biri ishinara qaıtarady. Qalǵandarynyń 3-5 jyl ishinde bul mindettemelerin merziminen buryn oryndaýǵa múmkindigi bar.
