Ulttyq statıstıka bıýrosynyń derekterine sáıkes, elimizdegi ýnıversıtetterde áleýmettik jáne gýmanıtarlyq ǵylymdar baǵyttary boıynsha doktorlyq dıssertasııany sátti qorǵaý kórsetkishi áli de tómen deńgeıde qalyp otyr.
Ýnıversıtet rektory Laýra Qarabasovanyń aıtýynsha, doktoranttar arasynda júrgizilgen zertteýler kórsetkendeı, ǵylymı jýrnaldarda maqala jarııalaý qıyndyqtary, sonyń ishinde akademııalyq jazý men zertteý etıkasy daǵdylarynyń jetkilikti qalyptaspaýynan týyndaıdy. Sonymen qatar jas ǵalymdarǵa jetekshilik etetin professor-oqytýshylardyń halyqaralyq ǵylymı ortaǵa kirýdegi kedergileri, bedeldi jýrnaldarda jarııalaný tájirıbesiniń azdyǵy jáne sheteldik konsýltanttarmen birlese jumys isteý shekteýleri de jıi aıtylyp jatyr.
«Zamanaýı zertteý ádisnamasyn, statıstıkalyq taldaý baǵdarlamalaryn jáne ǵylymı quraldardy meńgerý turǵysynan álsiz tustarymyz bar ekeni ras. Byltyr biz AQSh-taǵy Mınnesota ýnıversıtetimen birlesip, áleýmettik-gýmanıtarlyq saladaǵy zertteýshilerdiń qıyndyqtaryn zerdeleı bastadyq. Bul jumys nátıjeleri zertteýshilerdiń ádisnamalyq daıyndyǵyn kúsheıtý men júıeli ınstıtýsıonaldyq qoldaýdyń mańyzyn naqty kórsetti», dep atap ótti rektor.
Mınnesota ýnıversıteti – álemdik bedelge ıe joǵary oqý orny. Times Higher Education reıtınginde ýnıversıtet 88-orynda, al Mınnesota ýnıversıtetiniń Bilim jáne adam damýy kolledji (CEHD) 2025 jylǵy pándik reıtıngte «Bilim berý» salasy boıynsha 70-oryndy ıelendi. QS World University Rankings by Subject 2025 málimeti boıynsha ýnıversıtet «Bilim berý jáne daıarlyq» (Education & Training) baǵyty boıynsha álemde 53-orynda, U.S. News & World Report deregi boıynsha AQSh-taǵy úzdik bilim berý mektepteri reıtınginde 255 oqý ornynyń ishinde 24-orynda tur.
«Mınnesotamen baılanysym alty jyl buryn, zertteýshi retinde jumys istegen kezimde bastaldy. Sol ýaqytta Bilim jáne adamı damý kolledjiniń bir top professorymen birlesken jobada eńbek ettik. Keıin Aqtóbege rektor bolyp kelgende, osy yntymaqtastyqty keńeıtý bastamasyn kóterdim. Nátıjesinde professor Baskar Ýpýdıaı birneshe ret kelip, Jubanov ýnıversıtetiniń oqytýshylaryna zertteýshige qajet daǵdylar boıynsha semınarlar ótkizdi. Keıin «Bolashaq» baǵdarlamasy boıynsha ǵalymdarymyz taǵylymdamaǵa bara bastady. Osylaısha, eki ýnıversıtet arasyndaǵy yntymaqtastyqtyń berik irgetasy qalandy», deıdi L.Qarabasova.
Ýnıversıtet basshysy AQSh-qa sapary barysynda Mınnesota ýnıversıtetiniń ǵylymı zertteýler jáne ınnovasııalar jónindegi vıse-prezıdenti Shashank Prııa myrzamen jáne Bilim jáne adam damýy kolledjiniń dekany, Kampbell bilim berý jáne adam damýy salasyndaǵy kóshbasshylyq bóliminiń jetekshisi Maıkl Rodrıgespen kezdesip, bir jyldyq daıyndyq jumystarynyń nátıjesinde mańyzdy kelisimge qol jetkizgen.
Bul ortalyq tek Jubanov zertteýshilerine ǵana emes, otandyq ǵalymdar men oqytýshylarǵa arnalǵan jańa múmkindikter alańy bolmaq. Ol eń aldymen magıstranttar men doktoranttarǵa sabaq beretin professorlyq-oqytýshylyq quramnyń biliktiligin arttyrýǵa jáne halyqaralyq zertteý daǵdylaryn damytýǵa baǵyttalady.
