Koreıa Respýblıkasynyń Seýl qalasyndaǵy Korea ýnıversıtetinde Azııadaǵy joǵary bilim ordalary úshin asa áleýetti «QS Higher Ed Summit: Asia Pacific – 2025» sammıtiniń ótip jatqanyna búgin úshinshi kún. Osy saltanatty jıyn barysynda Abaı ýnıversıteti QS Stars júıesi boıynsha «Bes Juldyz» úzdik belgisin ıelenip, Qazaqstan joǵary oqý oryndaryna úlken serpilis ákeldi.
QS Stars reıtıngi – joǵary oqý oryndaryn oqytý sapasy, ǵylymı zertteý, túlekterdiń jumysqa ornalasýy, áleýmettik jaýapkershilik jáne basqarý tıimdiligi sııaqty negizgi baǵyttar boıynsha keshendi baǵalaıtyn halyqaralyq júıe. Bul baǵalaý ár ýnıversıtettiń biregeı artyqshylyqtaryn aıqyndap, olardyń jahandyq bilim keńistigindegi ornyn kórsetedi.
Marapat Seýl qalasynda ótken QS Stars Award Ceremony rásiminde Abaı atyndaǵy QazUPÝ Basqarma tóraǵasy-Rektor Bolat Tilepke saltanatty túrde tabys etildi. Onda QS Stars júıesi boıynsha aýdıtten sátti ótken jáne joǵary nátıjelerge qol jetkizgen Azııanyń úzdik ýnıversıtetteri ataldy.
– Ýnıversıtettiń keshendi aýdıtten ótýi bizdiń myqty jáne álsiz tustarymyzdy aıqyndaýǵa ári damý baǵyttarymyzdy naqtylaýǵa múmkindik berdi. Al «Bes Juldyz» reıtıngi – halyqaralyq deńgeıde búkil ujymymyzdyń júıeli, maqsatty jáne qajyrly eńbeginiń moıyndalýynyń aıqyn dáleli, – dedi rektor.
Osylaısha, Abaı ýnıversıteti «Bolashaq joǵary bilim» sammıtinde joǵary nátıjege qol jetkizip, Qazaqstannyń joǵary bilim salasynyń sapasy men halyqaralyq básekege qabilettiligin taǵy bir márte dáleldedi.
Eske sala keteıik, bilim berýdegi jańa tehnologııalar, demografııalyq ózgerister jáne Azııa ýnıversıtetteriniń tájirıbesi bıylǵy sammıttiń basty taqyrybyna aınaldy. Paneldik sessııalarda strategııalyq yntymaqtastyq negizi trend retinde qaraldy. Halyqaralyq basqosý qazirgi ýnıversıtetter úshin geografııalyq ornalasý nemese eldiń ekonomıkalyq damý deńgeıi basty nárse emes ekeni aıqyndap, ǵalamdyq akademııalyq qaýymdastyqty biriktiretin strategııalyq áriptestik jelileri men olardy damytý mańyzdy ekenin kórsetti.
