Qazaqstan – AQSh: Áleýetti áriptestikti nyǵaıtýǵa nıetti

Kommersııalyq kelisimder somasy 17 mlrd dollardan asady

Qasym-Jomart Toqaev Donald Tramptyń prezıdent­tik laýazymynyń tarıhı sı­pa­tyna toqtalyp, onyń basshylyǵymen AQSh álemniń jetekshi ekonomıkalyq, saıası jáne tehnologııalyq derjavasy retindegi pozısııasyn kúsheıtip kele jatqanyn atap ótti.

Qazaqstan Prezıdentiniń aıtýynsha, Amerıka kóshbasshysy jer júziniń qaýipsizdigin, turaq­ty­lyǵy men órkendeýin qam­tama­syz etýde sheshýshi ról atqarady.

Memleket basshysy Qazaq­stan AQSh Prezıdentiniń bitim­gerlik bastamalaryn tolyq qoldaı­tynyn jetkizdi. Sonyń ishinde keleshekte Orta dálizdi odan ári damytýǵa yqpal etetin «Tramp­tyń halyqaralyq beıbit­shi­lik jáne órkendeý jolyna» (TRIPP) erekshe nazar aýdardy.

Donald Tramp AQSh-tyń Qazaqstanmen kópjosparly keńeıtilgen strategııalyq seriktestikti damytýǵa nıetti ekenin rastady.

Sapar aıasynda Qazaqstan men Qurama Shtattary arasynda jalpy somasy 17 mlrd dollardan asatyn kommersııalyq kelisimderge qol qoıyldy.

Áńgimelesý barysynda ekijaqty yqpal­dastyqtyń keń kólemdegi máseleleri jan-jaqty talqylandy, ózara tıimdi yntymaq­tastyqtyń keleshegi zor baǵyttary naqtylandy.

Sonymen qatar prezıdentter halyqaralyq kún tártibiniń ózekti máseleleri jóninde pikir almasty.

Keleli kelisimge qosylý

Aq úıdegi kezdesý barysynda Qazaqstan men AQSh prezıdentteri Izraıl Premer-mınıstri Benıamın Netanıahýmen telefon arqyly sóılesti. Qazaqstan Respýblıkasynyń Ibrahım kelisimderine qosylýy áńgimelesýdiń arqaýy boldy.

Memleket basshysy Prezıdent Tramptyń Taıaý Shyǵysta beıbit ómir ornatýǵa naqty alǵysharttar jasap, kópshilik kúmánmen qarasa da, eleýli nátıjelerge qol jetkizgenine nazar aýdardy.

Ibrahım kelisimderine qosylý arqyly Qazaqstan qaqtyǵysty eńserýge, dıalogti ilgeriletýge jáne BUU Jarǵysy negizindegi halyqaralyq quqyqty qoldaýǵa úles qosady.

Qazaqstannyń bul sheshimi eshbir memleketpen ekijaqty qatynastardaǵy mindettemelerine nuqsan keltirmeıdi. Bul – beıbitshilik pen qaýipsizdikti nyǵaıtýdy kózdegen kópjaqty dıplomatııanyń zańdy jalǵasy ári naqty kórinisi.

AQSh prezıdenti Donald Tramp Qazaq­stannyń Ibrahım kelisimderine qosylý týraly sheshimin joǵary baǵalap, bul qadam ózge elderdi atalǵan bastamany qoldaýǵa úndeıtinin atap ótti.

– Bul – búkil álemde yntymaqtastyq ornatýda aıtarlyqtaı alǵa ilgerileý. Búginde kóptegen el Ibrahım kelisimi arqyly beıbitshilik pen órkendeý jolyn tańdap otyr, – dedi Donald Tramp.