Foto: aikyn.kz
«Osy zań jobasynyń uıytqysy bolǵan bizdiń depýtat áriptesterimizdi erekshe atap ótkim keledi. Bul – óz ýaqytynda kóterilgen ári óte mańyzdy bastama, sebebi sıfrlandyrý ekonomıkanyń damýyna jáne memlekettik basqarýdyń tıimdiligin arttyrýǵa yqpal etetin negizgi faktorlardyń biri», dedi depýtat.
Májilis depýtaty naqty tarmaqtarǵa toqtaldy.
«Sıfrlandyrý salasynda Ulttyq damý ınstıtýtyn qurý týraly túzetý taldaý jumystaryn jáne saraptamany kúsheıtýge baǵyttalǵan qadam sııaqty kórinedi, alaıda bul ınstıtýt naqty qandaı ispen aınalysatynyn túsiný qajet.
Aldyńǵy sıfrlyq bastamalardyń tarıhy bizge mańyzdy taǵylym beredi. «Zerde» holdıngi bastapqyda sıfrlyq damýdyń qozǵaltqyshy retinde qurylǵanymen, is júzinde fýnksııalardyń shoǵyrlanýyna, tıimsizdikke jáne qaǵazbastylyqqa alyp keldi», dedi Ábýtálip Mútáli.
Derbes derekterdi qorǵaý jáne kıberqaýipsizdik máselelerine jeke toqtalǵym keletinin aıtqan Á.Mútáli Kodeks jobasynda bul máselelerge arnalǵan jeke baptar bar ekenin, alaıda olar sıfrlyq ortadaǵy barlyq qatysýshylardyń múddesin naqty qorǵaý úshin áli de pysyqtalýy qajet ekenin atap ótti.
«Sońǵy jyldary elimizde ınternet-alaıaqtyq pen jeke aqparatty zańsyz paıdalaný keń etek jaıyp otyr. Bul jaǵdaı memlekettik te, jeke sektordyń da aqparattyq júıeleri tolyq qorǵalmaǵandyǵyn kórsetedi.
Bul normalardyń praktıkalyq tıimdiligin kúsheıtý qajet: derbes derekter operatorlaryna biryńǵaı talaptar engizý, aqparattyq júıelerdi turaqty aýdıtten ótkizý, IT-júıelerdi sertıfıkattaý jáne derekterdiń taralý faktileri týraly azamattar men ýákiletti organdarǵa mindetti túrde habarlaý tártibin belgileý qajet», dedi depýtat.
Májilismenniń aıtýynsha osy tetikterdi engizý qaýipterdi der kezinde anyqtaýǵa, keleńsiz jaǵdaılardyń aldyn alýǵa jáne azamattardyń, bıznes pen memlekettiń múddesin qorǵaýǵa múmkindik beredi. Sonymen qatar mundaı sharalar eldiń sıfrlyq jáne ulttyq qaýipsizdik maqsattaryn tikeleı qoldaıdy.
«Qorytyndylaı kele aıtarym - Sıfrlandyrýdyń ózi túpki maqsat emes ekenin aıqyn túsinýimiz qajet. Ol – adamdardyń ómir súrý sapasyn arttyrýǵa, bıznestiń damýyna jáne memlekettik basqarýdyń tıimdiligin kúsheıtýge qyzmet etetin qural. Bizdiń negizgi mindet – Sıfrlyq kodeksti dál osyndaı tıimdi tetikke aınaldyrý. Ol bıýrokratııany kóbeıtetin nemese jańa shekteýler týdyratyn qujatqa aınalmaýy tıis.
Osylaı etkende ǵana biz ashyq, qaýipsiz jáne tıimdi sıfrlyq memleketke berik irge bolatyn qujatty qabyldaı alamyz.
Ekinshi oqylymǵa deıin joǵaryda atalǵan barlyq máselelerdi muqııat pysyqtaý qajet», dep sózin túıindedi depýtat Ábýtálip Mútáli.
