Foto: Densaýlyq saqtaý mınıstrligi
Búginde emhanalarda 660 jedel járdem bólimshesi ashylǵan, olar 73,2% dárigerlermen, 100% meıirgerlermen jáne feldsherlermen qamtylǵan, tıisinshe emdelýshilerge qajetti kómek kórsetýge daıyn.
Densaýlyq saqtaý mınıstrliginiń málimetinshe, bıyldan bastap shuǵyl medısınalyq kómek kórsetý mindeti (saǵat 8:00-20:00 aralyǵy) halyq tirkelgen emhanadaǵy Medısınalyq-sanıtarııalyq alǵashqy kómek (MSAK) uıymdaryna júkteldi. Atalǵan qyzmetti tolyq qamtý úshin 995 mobıldi brıgada jumys istep jatyr. Bul – jedel járdem qyzmetterin edáýir jeńildetedi jáne úıdegi qońyraýlarǵa qyzmet kórsetýdi tezdetedi.
Jıyntyqta barlyq ózgerister MSAK dárigerleriniń qoljetimdiligin arttyrýǵa jáne qabyldaýdy kútý merzimin 2-3 kúnge deıin qysqartýǵa baǵyttalǵan.
Sala mınıstrligi medısınalyq-sanıtarııalyq alǵashqy kómektiń jańartylǵan standartyn bekitti. Negizgi ózgeris –jalpy praktıka dárigeriniń (JPD) jumys kúniniń jańa erejesi. JPD-niń jumys kúni qazir 8 saǵatty quraıdy: 6 saǵat – emdelýshilerdi qabyldaý, 2 saǵat – qujattamany rásimdeý jáne josparly saparlar.
Bul rejım qabyldaý sapasyn arttyrýǵa jáne dárigerlerge júktemeni azaıtýǵa múmkindik beredi. 2027 jylǵa qaraı barlyq MSAK uıymdary jalpy praktıka qaǵıdattaryna kóshedi. Terapevtter men pedıatrlar mobıldi jáne mýltıdıssıplınalyq toptardyń quramyna kiretin beıindi mamandar retinde jumys isteıtin bolady.
