Máselen, 2025 jyldyń maýsym-qyrkúıek aılary aralyǵynda Qamysty aýyly mańynda tórt ret iri qara maldyń joǵalýy tirkelgen. Mal ıelerine keltirilgen jalpy shyǵyn – 4 mln 550 myń teńge. Áýel, jaıylymnan qyzyl tústi sıyr joǵalyp ketken. Odan keıin aýyl turǵynynyń eki sıyry urlanǵan. Polısııa onyń birin Adaev aýylynan tapty. Kúdikti ol sıyrdy basqa bir malǵa aıyrbastap jibergen. Úshinshi jaǵdaıda aýyl turǵynynyń jaıylymnan eki bas maly joǵalady. Kóp ýaqyt ótpeı, taǵy eki sıyr urlanǵan.
Jedel is-shara barysynda polısııa tórt urlyqqa qatysy bar 19 jastaǵy aýdan turǵynyn ustady. Tergeý málimetinshe, kúdikti turǵyndardyń malyn jaıylymnan aıdap áketip, Aqtóbe qalasyna aparyp satyp otyrǵan.
«Ár mezgilde jasalǵan tórt urlyqqa qatysty derektiń bári bir óndiris sheńberinde biriktirildi. Mal urlyǵyn birneshe ret jasaý faktisi boıynsha sotqa deıingi tergeý júrgizilip jatyr», deıdi oblystyq PD-nyń baspasóz hatshysy K.Bazarbaeva.
Sondaı-aq Áýlıekól aýdanynda 14 bas asyl tuqymdy iri qara urlaǵan azamat ustaldy. Kúdikti buǵan deıin de mal urlaǵany úshin sottalǵan. Urlanǵan maldyń jalpy quny 7 mln teńgege baǵalanyp otyr. Qazir iri kólemdegi mal urlyǵy deregi boıynsha tergeý júrip jatyr.
«Mal urlyǵy» jedel-profılaktıkalyq is-sharasy aıasynda polısııa mal jáne et ónimderin tasymaldaý erejelerin buzǵan 20, mal jaıý erejesin saqtamaǵan 45 adamdy anyqtady.
Qostanaı oblysy
