«Eńbek» seriktestiginiń bazasynda «aqyldy ferma» iske qosyldy. Jaǵymdy jańalyqqa el qulaǵy eleń ete túsken. Budan bylaı beıneti besbatpan bal barmaq saýynshynyń bar sharýasyn robot tyndyratyn bolady. Zamanaýı júıe engizilgennen keıin qolǵa alynǵan jańalyqtyń arqasynda robot sıyrdyń saýyny kelgendigin ózi dál basyp anyqtaıdy. Qolmen atqarylyp kelgen barlyq sharýany adam oılaǵandaı tap-tuınaqtaı ete alady.
– Bul biz úshin úlken jetistik. Taýarly-sút fermasy osy bıikke shyǵý arqyly sıfrlandyrýdyń tek qalaǵa ǵana tán emes, aýyldyń da enshisi bar ekenin dáleldep otyr, – deıdi aýdan ákiminiń orynbasary Saıat Ahmetjanov. – Jańalyqtyń kóp septigi bar. Máselen, qol eńbegin azaıtsa, ekinshiden, aýyl jastarynyń qyzyǵýshylyǵyn týdyrýy ábden múmkin. Bilikti jastar zamanaýı tehnıka arqyly jumys isteýge yntaly bolýy da ǵajap emes qoı.
Robot-saýynshynyń eń áserli bóligi 3D kameralar men joǵary dáldiktegi sensorlar. Maldyń ornyn ózdiginen anyqtap, jelinge massaj jasap, ıdirip, jelindegi sútti muqııat saýyp alady. Barlyq jumys táýlik boıy úzdiksiz atqarylady.
– Buryn barlyq jumysty qolmen atqaratyn edik, – deıdi keshen basshysy Saǵjan Raqyshev. Qazir tek jumys yrǵaǵyn baqylap otyramyz. Eń bastysy, saýyn sıyrlardyń jaılylyǵy. Ol úshin klımat-baqylaý, jeldetkish, avtomatty perdeler ornatylǵan. Mal qorasynda mıkroklımat saqtalady.
Taýarly-sút fermasy 300 basqa shaqtalǵan. Táýligine alty tonnaǵa deıin sút óndiriledi. Júıeniń avtomattandyrylýynyń arqasynda barlyq jumys óz yrǵaǵymen atqarylyp jatyr. Sút ónimi týraly naqty derek sharýashylyqtyń sıfrlyq basqarý júıesine birden jiberiledi.
Jańalyqty jany jaqsy kóretin sharýashylyqtaǵy ilkimdi istiń legi jalǵyz fermadaǵy sharýamen ǵana shektelip qalmapty. 2013 jyldan bastap organıkalyq tyńaıtqyshty paıdalanyp egin egedi. 4 myń gektardan astam egin alqaby sertıfıkatqa ıe bolǵan. Ekologııalyq taza bıdaıǵa suranys joǵary. О́nimi Eýropa elderine eksportqa shyǵarylady.
Aqkóldiń «aqyldy fermasy» tehnologııasymen ǵana emes, adamdarymen de qýatty. Robottar bar sharýany minsiz atqarǵanymen, ony arnasyna túsirip otyratyn bilikti maman da qajet. Kásiporyn basshylary bul jaıdy jaqsy túsinedi.
– Qazir bizde seksennen astam adam eńbek etedi. Olardyń kóbi otbasylarymen osy sharýashylyqta. Jyl saıyn jumysshylarǵa turǵyn úı salyp, áleýmettik-turmystyq jaǵdaıyn jaqsartýǵa umtylyp kelemiz, – deıdi Saǵjan Raqyshev, – olar bolashaqqa senimdi bolýlary kerek. Senimdi bolsa ǵana aýyldy damyta alamyz. Búgingideı jaqsy jańalyqtardan shet qalmaı, zamananyń damý jolymen júretin bolsaq, el bolashaǵy jastar da turaqtap qalar edi. Beıneti besbatpan aýyr jumysty osyndaı tehnologııalyq damý arqyly jeńildetsek, jastardyń yqylasy elge aýady. Túptep kelgende el irgesin sókpeı, bosaǵasyn berik etetin talpynys dep oılaımyn.
Aýyldaǵy «aqyldy saýynshy» Astananyń azyq-túlik beldeýindegi yryzdyq molshylyǵyna óz úlesin qosyp jatyr. Osyndaı jan jadyratar jańalyq ózge óńirlerde de qanat jaısa ǵoı, shirkin!
Aqmola oblysy,
Aqkól aýdany
