Kolledj stýdentteriniń kásipkerlik bastamalaryn qoldaý jáne damytý maqsatynda uıymdastyrylǵan týrnırge bilim berý uıymdarynan qurylǵan 23 komanda boıynsha 58 stýdent 10 baǵyt boıynsha ózara synǵa tústi.
Básekeli jarys barysynda keleshekte kásipkerlikti damytýǵa nıetti stýdentter saýda, qyzmet kórsetý, óndiris, shoý bıznes, mádenıet, kreatıvti ındýstrııalar, tehnologııalyq kásipkerlik jáne ıntellektýaldy tehnologııalar, medısına, týrızm, basqa da mańyzdy baǵyttar boıynsha bilim-bilikteri men is-tájirıbelerin ortaǵa saldy.
Týrnırdiń alǵashqy kezeńinde qatysýshylardyń vızıt kartochkasy arqyly ózderin tanystyrý erekshelikteri, sahna men til mádenıetine qoıylatyn talaptardyń saqtalýy, ýaqytty utymdy paıdalanýy nazarǵa alyndy.
Al ekinshi kezeńde bıznes jobalardyń negizgi aspektilerin kórsetetin Canvas modelin qoldana otyryp, bıznes ıdeıalaryn usyndy. Bul kezeńde baıqaýǵa qatysýshy stýdentter atalǵan strategııalyq josparlaý quralynyń durys toltyrylýy, jobanyń ózektiligi men iske asyrylý qadamdary, sondaı-aq shyǵyndar qurylymy, kiris aǵyndary, tutynýshylarmen qarym-qatynas, beınebaıandary baǵalandy.
Týrnırge qatysýshylardyń jumystaryn saraptaý úshin arnaıy qazylar alqasy qurylyp, stýdentter eńbeginiń ádil baǵalanýyn qadaǵalady. Olardyń qatarynda oblystyq kásipkerler palatasy, jumyspen qamtý, bilim berý basqarmasy men jumys berýshi kompanııa ókilderi qatysty.
«Dástúrli túrde tehnıkalyq jáne kásiptik bilim berý uıymdaryndaǵy stýdentterdiń kásipkerlik bastamalaryn qoldaý men damytý maqsatynda ótkiziletin bul týrnırdiń mańyzy zor. Jumysshy mamandyqtar jyly aıasynda 100-den astam shara ótkizildi. Bilim berý uıymdarynyń aldynda turǵan mańyzdy mindettiń biri – stýdentterge eńbek naryǵyndaǵy suranysqa ıe mamandyqtardy usyný ǵana emes, sondaı-aq, kásipkerlik bastamalarǵa qoldaý kórsetý», – dedi tehnıkalyq jáne kásiptik, orta bilimnen keıingi bilim berý, kúrdeli jóndeý bóliminiń bas mamany, qazylar alqasynyń múshesi Erbol Jańbyrov.
О́ńirdegi kolledj stýdentteriniń izdenisteri men jetistikteri orasan zor. Sonyń biri, mamyr aıynda ótken «Bıznes arýy – 2025» oblystyq baıqaýyna 10 oqý ornynan 11 komanda qatysyp, oza shyqqan Almaty ekonomıkalyq kolledjiniń qyzdary respýblıkalyq baıqaýda júldeli 2-oryndy ıelenip, kásipke beıimdilikterin dáleldegen.
Týrnır qorytyndysy boıynsha jeńimpaz komandalar sertıfıkattarmen marapattaldy.
