A.Balaeva qaıyrymdylyqtyń basy-qasynda júrgenderdiń mádenıet pen bilim, ekologııa men medısına, áleýmettik qoldaý men qaıyrymdylyq salalarynyń damýyna aıtarlyqtaı úles qosyp kele jatqanyn erekshe atap ótti.
«Keıingi jyldary elimizde volonterlikti memlekettik qoldaýdyń birtutas júıesi qalyptasty, bul – árqashan memlekettik saıasattyń nazarynda. 5 jeltoqsan kúni BUU-nyń Nıý-Iork qalasyndaǵy Shtab-páterinde Ornyqty damý jolyndaǵy Halyqaralyq volonterler jyly resmı bastaýyn alady. Atalǵan jyldy jarııalaý týraly usynys Qazaqstan Respýblıkasynyń Prezıdenti Qasym-Jomart Kemeluly Toqaevtyń bastamasymen júzege asqanyn maqtan tutamyz», dep jazdy mınıstr.
Buǵan qosa ol elimiz úshin Ornyqty damý maqsattaryn iske asyrýdaǵy volonterlerdiń róline basa nazar aýdara otyryp, atalǵan jyl «Birge – turaqty bolashaq úshin!» uranymen jaqsylyq pen birliktiń jalpyhalyqtyq merekesine aınalǵanyn atap ótti. Sonymen qatar onyń jahandyq seriktestik rýhynda jańa múmkindikter ashatynyna, mıllıondaǵan adamdy turaqty, ádil jáne beıbit álem qurýdyń ortaq isine qatysýǵa shabyttandyratynyna senim bildirdi.
«Qurmetti volonterler! Memleket sizderdiń belsendiligińizdi, azamattyq ustanymyńyz ben jasampaz isterińizdi joǵary baǵalaıdy. Biz volonterlik bastamalardy odan ári qoldaımyz, damý úshin múmkindikterdi arttyramyz. Barlyq volonterge elimizdiń damýyna qosqan úlesi, tabandylyǵy, meıirimdiligi men óz isine adaldyǵy úshin shyn júrekten alǵys aıtamyn. Sizderdiń ıgi isterińiz árqashan qurmet pen qoldaý taýyp, adamdarǵa qýanysh pen shattyq ákelsin. Sizderge zor densaýlyq, amandyq, kúsh-qýat jáne qoǵamǵa qyzmet etý jolynda tabys tileımin!» dedi A.Balaeva quttyqtaýynda.
