Atyraý qalalyq polısııa basqarmasynyń qoǵamdyq qaýipsizdik bólimi bastyǵynyń orynbasary Mahsot Amangereıulynyń aıtýynsha, bıylǵy 11 aıda kámeletke tolmaǵandarǵa qarsy jasalǵan qylmys 13,7%, balalar arasyndaǵy jynystyq sıpattaǵy zańsyz áreketter 25,6% tómendegen.
«Jasóspirimder arasyndaǵy qylmystyń ótken jyldyń osy kezeńimen salystyrǵanda óskeni baıqalady. Osy kezge deıin 235 oqýshy mektepishilik esepke alyndy. Al túrli quqyq buzýshylyq jasaǵan 187 bala polısııa esebinde tur. Bala tárbıesimen aınalyspaı otyrǵan 200-ge jýyq ata-ana baqylaýǵa alyndy», deıdi Mahsot Amangereıuly.
Oblystyq bilim basqarmasynyń bólim basshysy Dýlat Hamzınniń deregine qaraǵanda, 227 mektepte ata-analardy qoldaıtyn pedagogıkalyq ortalyq qurylǵan.
«Jańa oqý jyly bastalǵaly chat arqyly balalardyń qaýipsizdigi men tárbıesine qatysty aqparattar men eskertýler taratyldy. Jasósipirimder arasyndaǵy quqyq buzýshylyqtyń basym bóligi sabaqtan keıingi keshki mezgilde jasalady», Dýlat Hamzın.
