Áleýmettik medısınalyq saqtandyrý qorynyń resmı ókili Zabıra Orazalıevanyń málimdeýinshe, pasıent tirkelgen emhanadan ózine qajet qyzmetti MÁMS júıesine qatysatyn kez kelgen klınıkadan alý úshin joldama ala alady. Osy joldama negizinde kórsetilgen medısınalyq qyzmet úshin azamat eshqandaı tólem jasamaıdy. О́ıtkeni ol shyǵyndar Qor tarapynan qosalqy oryndaýshy klınıkalarmen jasalǵan kelisimder aıasynda óteledi.
Eger emhanada belgili bir maman bolmasa nemese qajet tekserýlerdi júrgizýge arnalǵan jabdyq jetispese, naýqas basqa klınıkaǵa jiberiledi.
Mysaly, halyq sany az shaǵyn emhanalarda pýlmonolog, allergolog, angıohırýrg syndy tar beıindi dárigerler bolmaýy múmkin;
Keıbir emhanalarda ÝDZ, rentgen sııaqty dıagnostıkalyq apparattar joq;
mamandardyń jumys kestesi bir aıǵa tolyp ketýi yqtımal;
Dáriger eńbek demalysyna shyqsa nemese jabdyq ýaqytsha isten shyqsa da joldama beriledi.
Osyndaı jaǵdaılarda pasıent qajet qyzmetti alý úshin, onyń ishinde jeke klınıkaǵa da, joldama suraı alady.
Mańyzdysy – joldama tek Áleýmettik medısınalyq saqtandyrý qorynyń jetkizýshileri tiziminde bar jeke klınıkalarǵa ǵana rásimdeledi. Emhana men jeke klınıka arasynda kelisimsharttyń bolýy mindetti emes – joldama elektrondyq júıede avtomatty túrde qalyptastyrylady, - dep túsindirdi Áleýmettik medısınalyq saqtandyrý qorynyń resmı ókili.
Jeke klınıkada azamat tek keńes alyp, tekserýden ótip qana qoımaı, qajet bolǵan jaǵdaıda kúndizgi nemese táýliktik stasıonarda, sonyń ishinde MÁMS sheńberine kiretin túrli operasııalar jasata alady.
Eger emhana qajetti qyzmetke joldama bermese, aldymen sol medısınalyq uıymdaǵy Pasıentterdi qoldaý qyzmetine júginýge bolady. Másele sheshilmese, qorǵa resmı ótinish joldap, tekseris júrgizýdi suraýǵa múmkindik bar.
Qordyń túsindirýinshe, barlyq dıagnostıkalyq jáne konsýltasııalyq qyzmetter emdeýshi dárigerdiń sheshimimen taǵaıyndalady. Dáriger naýqastyń jaǵdaıyn, shaǵymdaryn, sımptomdaryn baǵalaıdy jáne kórsetilimder bolsa ǵana profıldi mamanǵa nemese zerthanalyq, aspaptyq zertteýlerge joldama beredi.
