Foto: Qala ákimdigi
Astana týrıster úshin nesimen tartymdy?
Astanany joǵary tehnologııalary, halyqaralyq standarttary jáne qolaıly baǵasy qyzyqty ete túsedi. Birqatar baǵyt boıynsha baǵalar Eýropa, Ońtústik Koreıa, Túrkııa elderimen salystyrǵanda áldeqaıda tómen, biraq qyzmet sapasy sáıkes deńgeıde tur. Sheteldik pasıentter úshin Astanada ortasha emdelý quny 2-5 myń AQSh dollaryn quraıdy.
Tikeleı áýe reısteriniń bolýy jáne damyǵan ınfraqurylym shetelden keletin pasıentterge joldy edáýir jeńildetedi. Kúz-qys maýsymynda 18 elmen, jaz aılarynda 20 elmen áýe baılanysy bar. Aptasyna 36 qalaǵa shamamen 250 halyqaralyq reıs oryndalady. Bul kórsetkish medısınalyq týrızmniń damýyna tikeleı áser etedi, ıaǵnı emdelý úshin saıahattaý áldeqaıda jeńildeıdi.
Júrek-qan tamyrlary medısınasynyń jetekshi ortalyqtarynyń biri – Astana
Astanada júrek-qan tamyrlary boıynsha asa kúrdeli operasııalardyń barlyq túri jasalady, onyń ishinde az ınvazıvti aralasýlar, stentteý, shýnttaý jáne týa bitken aqaýlardy túzetý.
Elordanyń basty jetistikteriniń biri – ALEM (Astana Life Ex-situ Machine) apparatynyń jasalýy. Bul qurylǵy donorlyq organdardy adam denesinen tys 24 saǵatqa deıin saqtaýǵa jáne emdeýge múmkindik beredi.
Ol 36-37°C temperatýrasyn ustap turady, ottegimen qamtamasyz etedi, qysym men qannyń gaz quramyn baqylaıdy, dıagnostıka júrgizýge jáne dári engizýge múmkindik beredi. Osylaısha transplantasııa ýaqytyn edáýir uzartyp, asqyný qaýpin azaıtady.
2025 jyly Medısınalyq ortalyq aýrýhanasynda alǵash ret júrekke robottyq operasııa jasaldy.
Ulttyq neırohırýrgııa ortalyǵy eń myqty ortalyqtardyń biri
Bas shahardaǵy atalǵan ortalyqta Gamma Knife júıesi ornatylǵan, ol mı isikteri men tamyrlyq patologııalardy tiliksiz, joǵary dáldikpen jáne mınımaldy jaraqatpen sáýlemen emdeýge múmkindik beredi. Qazaqstan – bul quraldy engizgen Ortalyq Azııadaǵy alǵashqy el. 2 000-nan astam radıohırýrgııalyq prosedýra jasalǵan.
Sonymen qatar, Astana reprodýktıvti medısına boıynsha Ortalyq Azııadaǵy jetekshi ortalyq mártebesin senimdi túrde saqtap keledi. Joǵary nátıjelilik, zamanaýı embrıologııalyq zerthanalar jáne qoljetimdi em baǵasy sheteldik pasıentterdi kóptep tartady. 2025 jyldyń alǵashqy 9 aıynda «Ekomed» klınıkasynyń elordalyq fılıalyna 102 sheteldik pasıent júgingen. Kelýshiler sany boıynsha Reseı, Qytaı, Qyrǵyzstan alǵashqy úshtikte.
Stomatologııa – suranysqa ıe baǵyttardyń biri
Stomatologııa jáne estetıkalyq medısına – Astanadaǵy medısınalyq týrızmniń eń suranysqa ıe baǵyttarynyń biri. Sebepteri aıqyn: zamanaýı jabdyq, joǵary sapa jáne Eýropa jáne Taıaý Shyǵyspen salystyrǵanda áldeqaıda tómen baǵa. Elorda klınıkalary keń aýqymdy qyzmetterdi usynady: estetıkalyq stomatologııa, ımplantasııa jáne protezdeý; zamanaýı elaınerler men sıfrlyq josparlaý júıelerin qoldanatyn ortodontııa; plastıkalyq hırýrgııa, onyń ishinde rınoplastıka, blefaroplastıka, lıpomodeldeý, rekonstrýksııalyq operasııalar.
Sheteldik pasıentter kóbine konsýltasııalar, hırýrgııalyq aralasý jáne operasııadan keıingi qoldaýdy qamtıtyn keshendi paketterdi tańdaıdy eken.
Qalpyna kelýdiń qysqa merzimderi men mamandardyń joǵary biliktiligi bul baǵyttardy medısınalyq týrızm úshin eń tanymal etýge yqpal etedi.
Jańa týrónim
Astana Tourism klınıkasy Astana Vision-men birlesip jańa týrónimdi iske qosty. Ol týrısterge elordaǵa saıahatty kózdi kásibı dıagnostıkalaý jáne kórýdi túzetý rásimderimen ushtastyrýǵa múmkindik beredi. Astanaǵa emdelý maqsatynda emes kelgen qonaqtar da tekserýden tez ótip, lazerlik korreksııa nemese basqa da prosedýralardy óz josparlaryn ózgertpeı oryndaı alady.
Osylaısha elordaǵa sapar tek saıahat emes, densaýlyqqa jol ashatyn qadamǵa aınalady.
«Medısınalyq týrızm – búginde eń suranysqa ıe baǵyttardyń biri. Qazaqstan JCI akkredıtasııasynan ótken klınıkalar sany boıynsha álemde 25-orynda, olardyń 7-eýi Astanada ornalasqan.
2024 jyly shamamen 4,5 myń sheteldik pasıent JCI standarttary boıynsha em aldy. Olardyń qatarynda chekap baǵdarlamalary, reprodýktıvti medısına, kardıohırýrgııa, onkologııa bar.
Biz dıagnostıkany jáne emdeýdi ekskýrsııalyq baǵdarlamalarmen birge usynatyn medısınalyq týrpaketter qalyptastyryp jatyrmyz», dedi «Astana Tourism» týrızmdi damytý ortalyǵy basqarmasynyń tóraǵasy Artıom Kvashýk.
