«Astana» «Lokomotıvke» ese jiberdi

ASTANA. 22 naýryz. VTB lıgasy aıasynda «Astana» basketbol komandasy Kýbanǵa qonaqqa baryp, jergilikti «Lokomotıvten» 79:105 esebimen jeńilýge májbúr boldy. Bul týraly egemen.kz habarlady. Ramýnas Býtaýtas bas jattyqtyrýshy bolyp kelgeli oıyn órnegine qan júgirgen bizdiń komanda sońǵy kezderi mańyzdy upaılarǵa qol jetkizip júrgeni belgili. Osynyń aldyndaǵy oıynda Qazannyń ÝNIKS-in jeńgenimiz de esimizde. Al «Lokomotıv» sońǵy kezdesýin Rıganyń VEF komandasyna qarsy ótkizip, ese jibergen edi. Sondyqtan otandyq jankúıerler «Astanadan» taǵy da jeńis kútkeni jasyryn emes. Alaıda, kýbandyqtar aldyńǵy oıynnan sabaq shyǵaryp, birden tizgindi óz qoldaryna aldy. Dese de, esepti bizdiń basketbolshylar ashqanyn aıta keteıik. Alǵashqy kezeńdi óz paıdalaryna 27:14 esebimen aıaqtaǵan alań ıeleri oıynnyń ekinshi bóliginde de «Astananyń» adymyn ashtyrmady. Tipti úlken úzilis aldynda esep aıyrmasy 28 upaıǵa deıin (54:26) ulǵaıyp, «Lokomotıv» aıqyn basymdyqpen alǵa shyqty. Áıtse de, ekinshi kezeń sońynda 54:29 esebi tirkeldi. Qalǵan eki kezeńde «Astana» namysqa tyrysyp baqty. Tipti úshinshi kezeńde jeńiske jetti (27:26). Al sońǵy kezeń taǵy alań ıeleriniń basymdyǵymen aıaqtaldy (25:23). Nátıjesinde, elordalyqtar iri eseppen ese jiberdi. Kezdesý barysynda «Astana» komandasynyń basketbolshysy Rashıd Mahalbasıch eń kóp upaı jınady. Ol 40 mınýttyń ishinde 19 upaıdy enshisine jazǵan eken. Al alań ıeleri sapynan Rashıdten bir upaıy kem Andreı Zýbkov sheberligimen kózge tústi. Osy jeńilisinen keıin «Astana» týrnır kestesinde bir saty tómen syrǵyp, qaıtadan 10-orynǵa túsip qaldy. Ramýnas Býtaýtas shákirtteri kelesi oıyndy 29 naýryzda syrt alańda «Hımkıge» qarsy ótkizedi. Atalǵan komanda lıgadaǵy úzdikterdiń biri ekeni belgili. Búginde olar týrnır kestesinde 2-orynda keledi. Elaman Qońyr. Derek: egemen.kz. Sýret: vtb-league.com.