«Zań jáne tártip» tujyrymdamasy aıasynda mańyzdy áleýmettik aksııa ótti. Bizdiń ortaq maqsatymyz – esepte turǵan azamattarǵa naqty qoldaý kórsetip, olardyń zańǵa baǵynatyn ári turaqty ómirge qaıta oralýyna jaǵdaı jasaý. Biz qaıta quqyq buzýshylyqtyń aldyn alýda eńbekpen qamtý negizgi faktor ekendigin túsinemiz. Sondyqtan bir alańda bıznes ókilderi men jumyspen qamtý qyzmeti jınalyp, jumys oryndaryn, tegin oqytý múmkindikteri men kásibı keńester usyndy. Árbir qatysýshyǵa óz taǵdyryn ózgertýge múmkindik berilip otyr», dedi Astana qalasy prokýratýrasy basqarmasynyń aǵa prokýrory Nurtas Dúısembaev.
Mamandar probasııa qyzmetiniń esebinde turǵan adamdardyń qarjylyq máseleleri men nesıelik júktemelerin nazarǵa aldy. Zańgerler men sot oryndaýshylar azamattarǵa bereshekterin retteýge, kúrdeli jaǵdaılardy zańdy jolmen sheshýge kómek berdi. Sonymen qatar jıynda medısınalyq blok jumys istedi. Munda qatysýshylar dárigerlerdiń keńesin aldy. Budan bólek, qatysýshylar elektrondyq úkimet portalynda tirkelý, memlekettik qyzmetterdi, onyń ishinde qujattandyrý máselesi boıynsha qyzmetterdi HQKO-ǵa barmaı-aq sol jerde ala aldy.
«Bul aksııa – prokýratýramen memlekettik organdar júrgizip otyrǵan júıeli jumystyń bir bóligi. Biz «Zań jáne tártip» ár azamattan bastalatynyna senemiz. Al bizdiń mindet – adamnyń jańa bolashaqqa nyq qadam jasaýyna múmkindik beretin jaǵdaı jasaý», dedi aǵa prokýror.
Prokýratýra ókiliniń aıtýynsha, qazir Astanada 2500-den astam adam probasııa qyzmetinde esepte tur. Olardyń kópshiligi – 25-35 jas aralyǵyndaǵy azamattar.
«Osy áleýmettik aksııaǵa 25 jumys berýshi qatysty. Olar 300-ge jýyq bos jumys ornyn usyndy. Olardyń qatarynda santehnık, tiginshi, elektrık sekildi birneshe jumystar bar», dedi Astana qalasy ákimdigi Eńbek mobıldiligi ortalyǵynyń dırektory Oljas Omar.
