Senat tóraǵasy Rım Papasy XIV Leoǵa Qazaqstan Prezıdenti Qasym-Jomart Toqaevtyń jyly lebizin jáne elimizge Apostoldyq saparmen kelý jónindegi shaqyrýyn jetkizdi. Máýlen Áshimbaev kezdesýde Qazaqstannyń Vatıkanmen kópjosparly yntymaqtastyqty odan ári nyǵaıtýǵa múddeli ekenin atap ótti.
«Túrli etnostyq jáne dinı qaýymdastyqtardyń qutty mekeni sanalatyn Qazaqstan Qasıetti Taqtyń beıbitshilikti, úılesimdilikti jáne ózara qurmetti dáripteý jónindegi bastamalarymyzdy únemi qoldap kele jatqanyn joǵary baǵalaıdy. Qazaqstan men Vatıkan arasyndaǵy aıryqsha dostyq pen yntymaqtastyq qalyptasqan sabaqtastyqqa taban tirep, nyǵaıyp keledi. Asa Qasıetti, Siz búginde ózara qarym-qatynasty jańartylǵan tásilder negizinde dáıekti túrde odan ári damytyp otyrsyz. Biz Vatıkannyń Álemdik jáne dástúrli dinder kóshbasshylarynyń sezine kórsetken turaqty qoldaýy úshin erekshe iltıpatymyzdy bildiremiz. Sizdiń VIII Sezd qatysýshylaryna úndeýińiz osy forýmnyń Qorytyndy deklarasııasymen birge, jahandyq dıalogti nyǵaıtý jáne ekstremızm men tózbeýshilikke qarsy is-qımyl jolyndaǵy rýhanı baǵdar retinde qyzmet etedi. Asa Qasıetti, О́zińizge qolaıly ýaqytta Apostoldyq saparmen Qazaqstanǵa kelýińiz biz úshin úlken mártebe bolar edi. Mundaı sapar óńirimizdegi áralýan qoǵamnyń ókilderin jigerlendirip, ádiletti ári úılesimdi halyqaralyq tártipti kózdeıtin ortaq umtylysymyzǵa tyń serpin beredi senemin», delingen Qazaqstan Prezıdenti Qasym-Jomart Toqaevtyń Rım Papasy XIV Leoǵa joldaǵan arnaıy hatynda.
Máýlen Áshimbaev aýdıensııa úshin alǵys bildire otyryp, Vatıkan delegasııasy Álemdik jáne dástúrli dinder kóshbasshylarynyń VIII Seziniń Qorytyndy deklarasııasyn ázirleýge belsendi qatysqanyn atap ótti. Sondaı-aq ol Sezd Hatshylyǵynyń Deklarasııa erejelerin iske asyrý maqsatymen júrgizip jatqan jumysyna toqtaldy.
«Qazaqstan Prezıdenti Qasym-Jomart Toqaev Vatıkanmen qarym-qatynasty nyǵaıtýǵa únemi basa mán beredi, sondaı-aq Sizdiń dinaralyq jáne mádenıetaralyq dıalogti nyǵaıtý jónindegi kúsh-jigerińizdi joǵary baǵalaıdy. Qasıetti Taqtyń ókilderi Álemdik jáne dástúrli dinder kóshbasshylarynyń VIII Seziniń Astana beıbitshilik deklarasııasy-2025 atty qorytyndy qujatyn ázirleýge belsendi qatysty. Sezd Hatshylyǵy Deklarasııany iske asyrý aıasynda dinı uıymdardyń klımattyń ózgerýine qarsy kúrestegi róli týraly qujat daıyndaý jumystaryn qolǵa aldy. Sondaı-aq din kóshbasshylarynyń kózqarasyn eskere otyryp, Jasandy ıntellektini damytýdyń etıkalyq kodeksin ázirleýdi de bastadyq. Biz ǵylymı-tehnologııalyq progress sheńberinde rýhanı qundylyqtarǵa basymdyq berý ıdeıasyn dáripteıtin Qasıetti Taqtyń osy saladaǵy kóshbasshylyǵyn joǵary baǵalaımyz. Bul máselede Katolık shirkeýiniń ınstıtýttarymen belsendi ózara is-qımyl ornatýǵa daıynbyz», dep M.Áshimbaev Rım Papasyna dinı senimi úshin qaza tapqandardy eske alý belgisi retinde Qazaqstan aýmaǵynda qýǵyn-súrginge ushyraǵan katolık dini qyzmetkerleriniń tizimin tabys etti.
О́z kezeginde, Rım Papasy XIV Leo Qazaqstannyń túrli dinderdiń ókilderi arasyndaǵy beıbitshilikti jolǵa qoıý jáne jahandyq deńgeıde órkendeýdi ilgeriletý jónindegi bastamalaryn joǵary baǵalaıtynyn jetkizdi. Pontıfık qazirgi syn-qaterler jaǵdaıynda Álemdik jáne dástúrli dinder kóshbasshylarynyń sezi aıasynda jasalyp jatqan izgi amaldar men qadamdardyń mańyzdy ekenin atap ótti. Sondaı-aq ol Qasıetti Taq tarapy mundaı mıssııany únemi qoldaıtynyn aıtty.
Qazaqstan men Vatıkannyń beıbitshilikti, dıalog pen ózara túsinistikti ilgeriletý jónindegi birlesken bastamalaryna arnalǵan dóńgelek ústel barysynda din kóshbasshylarynyń qazirgi róli men rýhanı dıplomatııanyń mańyzy jan-jaqty talqylandy.
M.Áshimbaev búginde rýhanı kóshbasshylar dinı senimine, etnostyq tegine jáne saıası kózqarasyna qaramastan ártúrli mádenıetter, dinder men halyqtar arasyndaǵy qarym-qatynastyń berik kópirin qalyptastyrýda mańyzdy ról atqaratynyn atap ótti. О́ıtkeni din lıderleri qoǵamda adamgershilik pen birliktiń qajettiligi artqan kezde durys baǵdardy aıqyndap, oń qundylyqtar júıesin nasıhattaýǵa yqpal ete alady. Sonymen qatar ol Sezd Hatshylyǵy men Vatıkan Dıkasterııasynyń Astana beıbitshilik deklarasııasyn iske asyrý barysyndaǵy birlesken jumysyna arnalǵan mańyzdy mindetterge nazar aýdardy. M.Áshimbaev óz sózinde Qazaqstan Prezıdenti jańa jahandyq qozǵalys qalyptastyrýǵa, klımattyq ózgeristerge qarsy kúres sharalaryna jáne zamanaýı tehnologııalar men jasandy ıntellektini jaýapkershilikpen paıdalanýǵa basa mán berip otyrǵanyn tilge tıek etti.
«Rýhanı kóshbasshylar Qazaqstan Prezıdenti Qasym-Jomart Toqaevtyń beıbitshilik jolynda jańa jahandyq qozǵalys qalyptastyrý jónindegi bastamasyna qoldaý bildirdi. Bul – halyqaralyq dıalogti jandandyrýǵa jáne kelispeýshilikter men qaqtyǵystardy eńserýdi, halyqtar arasyndaǵy senimdi nyǵaıtýdy, beıbitshilik pen ádilettilik murattaryn ornyqtyrýdy qalaıtyn barlyq qoǵamnyń kúsh-jigerin biriktirýge bastaıtyn mańyzdy qadam. Osy oraıda halyqaralyq uıymdarmen, onyń ishinde eń aldymen, Birikken Ulttar Uıymymen yntymaqtastyq úlken ról atqarady. Aldaǵy ýaqytta da Astana beıbitshilik deklarasııasynyń negizgi erejelerin iske asyrý jolynda Dıkasterııamen syndarly ózara is qımylymyzdy ári qaraı jalǵastyra beremiz dep senemiz», dedi Senat tóraǵasy.
Dóńgelek ústel aıasynda Qazaqstandaǵy Konfessııaaralyq jáne dinaralyq dıalogtiń halyqaralyq ortalyǵy men Vatıkannyń Dinaralyq dıalog jónindegi Dıkasterııasy arasynda memorandýmǵa qol qoıyldy. Qujat ózara moıyndaýdy bekitip, taraptardyń dinaralyq jáne konfessııaaralyq dıplomatııa salasyndaǵy yntymaqtastyqty damytýǵa, sondaı-aq ınstıtýsıonaldyq seriktestikti nyǵaıtýǵa arnalǵan mindettemelerge beıil ekeni rastaıdy. О́zara túsinistik týraly memorandým eki tarap ta múddeli salalarda ozyq tájirıbemen jáne bilimmen almasýdy kózdeıtinin de atap ótken jón.
Sonymen qatar bul kúni Senat tóraǵasy Qasıetti Taqtyń Dinaralyq dıalog jónindegi dıkasterııasynyń prefekti kardınal Djordj Kývakadpen ekijaqty kezdesý ótkizdi. Onda eki eldiń mádenıetaralyq jáne dinaralyq dıalog salasyndaǵy yntymaqtastyǵynyń basym baǵyttary sóz boldy.
