Kongrestiń ashylý saltanatynda Memlekettik keńesshi Erlan Qarınniń quttyqtaýyn, sondaı-aq qala basshysy Darhan Satybaldynyń jas ǵalymdarǵa arnaǵan jyly lebizin ákimniń orynbasary Abzal Núkenov oqyp berdi.
Ǵylym jáne joǵary bilim mınıstri S.Nurbektiń jas ǵalymdarǵa quttyqtaýyn Ǵylym jáne joǵary bilim salasyndaǵy sapany qamtamasyz etý komıtetiniń tóraǵasy Ádilet Toıbaev jetkizdi.
Alqaly jıynǵa Oqý-aǵartý mınıstri Juldyz Súleımenova qatysyp, jaqynda Prezıdent janyndaǵy UǴA-men Jas zertteýshiler akademııasyn qurý týraly memrandýmǵa qol qoıylǵanyn atap ótti. Vedomstvo basshysy osy rette ǵylymǵa áýesqoı balalardyń mektepterde kóp ekenin nazarǵa ala otyryp, onyń áleýetin kóterý maqsatyndaǵy jumystardy jetildirý qajettigine toqtaldy. Mınıstr jas ǵalymdardy mektepterge shaqyryp, jaqsy ǵalym tárbıeleýdiń negizi júıeli bilim irgetasyn quraıtyn bilim ordalarynda ekenin, osy oraıda Memleket basshysynyń tapsyrmasynan iske asyp jatqan «Keleshek mektepteri» jobasynyń mańyzdylyǵyn atap ótti.
Kongreske kelgen jas ǵalymdardy qoshemetpen qarsy alǵan Prezıdent janyndaǵy Ulttyq ǵylym akademııasynyń prezıdenti Aqylbek Kúrishbaev: «Qazaqstan Respýblıkasynyń Memlekettik keńesshisi Qarın Erlan Tynymbaıulynyń arnaıy joldaǵan quttyqtaý sózi úshin shynaıy alǵys bildiremin! Qazaqstanda jas zertteýshilerdiń úlesiniń 46 paıyzǵa artýy – Memleket basshysy Qasym-Jomart Kemeluly Toqaevtyń júıeli ári dáıekti saıasatynyń jemisi ekenin erekshe atap ótkim keledi. Búgingi kongress – jasandy ıntellekt pen ınnovasııalar qarqyndy damyǵan ýaqytta, sonymen qatar klımattyń ózgerýi, demografııalyq úderister jáne resýrstarǵa suranys kúrt artqan jahandyq qaterler kezeńinde ótýde. Degenmen, árbir jańa syn-qater ǵylymı paıymdaýdy jáne talqylaýdy talap etetin qosymsha múmkindikterge jol ashatyny anyq. Akademııa úshin mundaı aýqymdy kongresti ótkizý – úlken mártebe. Onyń jumysyna Qazaqstannyń barlyq óńirlerinen jáne shet elderden kelgen myńnan astam jas ǵalym qatysýda. Kongreske 26 memleketten kelgen 80-nen astam ǵalymdy erekshe yqylaspen qarsy alyp otyrmyz. Olardyń arasynda álemdik deńgeıdegi ozyq zertteýlerge tabysty úles qosyp júrgen otandastastarymyz, Qazaqstannan shyqqan jastarymyz bar», dedi.
Kongreste jas ǵalymdar keńesiniń qyzmetine qatysty baıandama jasaǵan Prezıdent janyndaǵy UǴA Jas ǵalymdar keńesi tóraǵasynyń orynbasary, HBK ǵylym departamentiniń dırektory Shahıslam Laıshanov atqarylǵan jumystar, júzege asqan jobalar, ǵalymdar jetistikteri týraly aıtyp ótti. Sondaı-aq jıynǵa qashyqtan qatysqan Nobel syılyǵynyń laýreaty, Týskııa ýnıversıtetiniń professory, Eýropalyq-Jerorta teńizi klımat ortalyǵynyń strategııalyq dırektory klımatqa qarsy kúres qory (CMCC), Italııa Valentını Rıkkardo «Jahandyq ózgerister jáne olardyń jaǵymsyz saldaryn boldyrmaý úshin ekologııalyq monıtorıng» (onlaın), Prezıdentiniń janyndaǵy Ulttyq ǵylym akademııasynyń akademıgi, Nazarbaev ýnıversıtetiniń professory Dórbetqan Suraǵan «ISAAC 2025: Qysqasha qorytyndy», Ph.D, oftalmolog dáriger (Cardiff University, UK), Gonkongtegi kórý jáne kózdi zertteý ortalyǵynyń Kvanttyq optıka zerthanasynyń basshysy Muhıt Qulmaǵambetov «Multidimensional Ophthalmology:kvanttyq bólshekterden bastap avıaǵaryshtyq shekaralarǵa deıin», Nazarbaev ýnıversıtetiniń assıstent-professory, Prezıdenti janyndaǵy UǴA Jas ǵalymdar keńesi prezıdıýmynyń múshesi Gúlnur Kalımýldına «Qazaqstandaǵy ǵylymı ıdeıalardy kommersııalandyrý prosesi: ádisteri men máseleleri» taqyrybynda baıandama jasady.
Ǵylymnyń ártúrli baǵyttarynda jas ǵalymdardyń ǵylymı jetistikterimen almasýy jáne dıalog júrgizýi úshin turaqty platforma qalyptastyrýǵa negiz bolǵan jastar kongresinde shet elderde tabysty qyzmet etip, ǵylymı zertteý jumystarymen aınalysyp júrgen jas ǵalymdardyń áleýetin otandyq ǵylymdy damytýǵa paıdalaný, jas ǵalymdardyń halyqaralyq jáne pánaralyq deńgeıdegi ǵylymı-zertteý daǵdylaryn damytý, ǵylymı bilimdi jáne sońǵy ǵylymı jetistikterdi nasıhattaý, jas zertteýshilerdiń eńbekterine qoǵam nazaryn aýdarý, kásibı ósýine jaǵdaı jasaý jáne olardyń irgeli jáne qoldanbaly zertteýlerge belsendi qatysýyna yqpal etý sııaqty kóptegen mańyzdy máseleler talqylandy.
