Bas prokýratýranyń málimetinshe, atalǵan tulǵalar Qylmystyq-prosestik kodekste kózdelgen zańdy tergeý áreketterin, atap aıtqanda, jaýap alýǵa qatysý, jaýap alýdy júrgizý, sondaı-aq sottyń úıqamaq túrindegi bultartpaý sharasyn tańdaý sııaqty prosessýaldyq sheshimderdi ádeıi azaptaý retinde kórsetip, qoǵamdy adastyryp otyr.
Vedomstvo Qazaqstan zańnamasynda «azaptaý» uǵymynyń naqty aıqyndalǵanyn atap ótti. Qylmystyq kodekstiń 146-babyna sáıkes, azaptaý dep laýazymdy tulǵanyń tán nemese psıhıkalyq zardapty qasaqana keltirýi tanylady. Bul anyqtama Qazaqstan ratıfıkasııalaǵan BUU-nyń Azaptaýlarǵa jáne basqa da qatygez, adamgershilikke jatpaıtyn nemese ar-namysty qorlaıtyn is-áreketter men jazalaý túrlerine qarsy konvensııasynyń, sondaı-aq Ystambul hattamasynyń normalaryna tolyq sáıkes keledi.
Qazirgi tańda prokýratýra organdary tarapynan atalǵan qylmystyq isterdiń qatysýshylaryna qatysty tergeýshilerdiń zańsyz áreketteri nemese azaptaý faktileri tirkelmegen. Barlyq prosessýaldyq áreketter Qylmystyq-prosestik kodekstiń talaptaryn qatań saqtaı otyryp júrgizilip jatyr.
Bas prokýratýranyń málimdeýinshe, jalǵan aqparat taratyp otyrǵan tulǵalar ózderine tıimdi qoǵamdyq pikir qalyptastyrýdy, quqyq qorǵaý organdarynyń bedelin túsirýdi jáne qylmystyq isterdi tolyq, jan-jaqty ári obektıvti tergeýge kedergi keltirýdi kózdep otyr.
Osyǵan baılanysty Bas prokýratýra kórineý jalǵan aqparat taratqany, sondaı-aq sotqa deıingi tergep-tekserýdi júzege asyratyn tulǵalardyń qyzmetine qandaı da bir túrde aralasqany úshin qylmystyq jaýaptylyq kózdelgenin eskertti.
Eske salaıyq, buǵan deıin KazTAG agenttiginiń bas redaktory polıseıdiń ústinen «tónip turǵanyn» azaptaýǵa teńegenin málimdegen bolatyn. Al Orda.kz basylymynyń advokaty Murat Adam bas redaktorǵa qoldanylǵan úıqamaqty azaptaýmen teńestirdi.
