Foto: istockphoto.com
Ortalyq kommýnıkasııalar qyzmetinde ótken brıfıngte qala basshysy jańa áýejaı qurylysyna qatysty suraqtarǵa jaýap berdi. Ákimniń aıtýynsha, qazirgi tańda tarap jatqan aqparattar – jaı ǵana qaýeset. Degenmen, qalanyń bas josparynda bolashaqta qajettilik týyndaǵan jaǵdaıda qosymsha áýejaı salý úshin birneshe arnaıy ýchaske aldyn ala belgilenip qoıǵan.
«Erte me, kesh pe ekinshi, tipti odan da kóp áýejaı qajet bolady. Biraq búgingi tańda biz qoldanystaǵy áýejaıdyń áleýetin paıdalanýdy kózdep otyrmyz. Onyń qýattylyǵyn eki ese arttyrý josparda bar», dedi Jeńis Qasymbek.
Sonymen qatar ákim qazirgi áýejaıdyń temirjol jelilerinen qashyq ornalasqanyn atap ótti. Eger bolashaqta jolaýshylar sany men júk tasymaly aǵyny eselep artatyn bolsa, jańa áýe aılaǵyn salý máselesi kún tártibine shyǵýy múmkin. Ázirge bılik bar nazardy qoldanystaǵy nysandy jańǵyrtýǵa aýdarmaq.
Buǵan deıin qala ákimi 2027 jyly Astanada alǵash ret eki deńgeıli alyp avtomagıstral qurylysy bastalatynyn jáne LRT-nyń jospardan erte ashylýy múmkin ekenin aıtqan edi.
