Onyń aıtýynsha, elimizdiń bank júıesi turaqty ári senimdi kúıde.
«Bank júıesinde kapıtal qory jetkilikti deńgeıde qalyptasqan. Kapıtaldyń jetkiliktilik deńgeıi 2,7 paıyzdy quraıdy, al eń tómengi talap – 8 paıyz. Iаǵnı, ótimdilik pen kapıtaldyń aıtarlyqtaı qory bar, sondyqtan bankterdiń bankrotqa ushyraýyna eshqandaı alǵyshart joq», dedi agenttik tóraǵasy.
Madına Ábilqasymovanyń málimetinshe, qazirgi tańda qadaǵalaý júıesi banktik sektorda táýekelderdiń aldyn alýǵa baǵyttalǵan. Osy maqsatta jyl saıyn aktıvterdiń sapasyna baǵalaý júrgiziledi, bankterdiń nesıe portfeli tekserilip, anyqtalǵan shyǵyndar boıynsha tıisti provızııalar qalyptastyrylady.
«Sonymen qatar bankterdiń kúızelis jaǵdaılaryna tózimdiligin anyqtaý úshin qadaǵalaý stress-testileýi júrgiziledi. Budan bólek, banktiń bıznes-modeli, korporatıvtik basqarý deńgeıi jáne basqa da táýekelder baǵalanady. Osy baǵalaýlardyń negizinde jyl saıyn bankter úshin qosymsha qadaǵalaý kapıtaly belgilenedi. Munyń barlyǵy bankrottyqtyń aldyn alýǵa baǵyttalǵan», dep túsindirdi agenttik basshysy.
Ol sondaı-aq bankrot dep tanylǵan bankterge memlekettik qoldaý kórsetilmeıtinin atap ótti. Mundaı bankter zańnamaǵa sáıkes mindetti túrde taratylýy tıis.
«Qazirgi ýaqytta elimizde toǵyz bank taralý satysynda tur. Olardyń lısenzııalary 2007-2021 jyldar aralyǵynda qaıtarylyp alynǵan. Memlekettik qoldaý tek qarjylyq turaqtylyǵyn qalpyna keltirýge múmkindigi bar bankterge ǵana kórsetildi», dedi Madına Ábilqasymova.
Onyń aıtýynsha, 2017 jyly qarjylyq turaqtylyqty qamtamasyz etý baǵdarlamasy qabyldanyp, onyń aıasynda alty bankke jalpy somasy 1,8 trln teńge kóleminde memlekettik qoldaý kórsetilgen. Sonyń ishinde úsh bank 738 mlrd teńge kólemindegi qarajatty merziminen buryn tolyq qaıtardy. Qalǵan úsh bank te memlekettik qoldaýdy josparlanǵan merzimnen erte óteýdi kózdep otyr.
