Jumysshy mamandyqtar jylyn qorytyndylaýǵa arnalǵan oblystyq forýmǵa aımaq basshysy Nurymbet Saqtaǵanov qatysty.
– Memleket basshysy Qasym-Jomart Toqaev jarııalaǵan Jumysshy mamandyqtar jyly elimiz úshin erekshe mańyzǵa ıe boldy. Búgingi forým jyl qorytyndysyn shyǵaratyn, nátıjelerdi baǵalaıtyn jáne óńir ekonomıkasynyń damýyna úles qosqan mamandardyń eńbegin atap ótetin alań. Jyl boıy osy baǵytta aıtarlyqtaı jumys júrgizildi. Jańa mamandyqtar ashylyp, sheberhanalar men zerthanalar kezeń-kezeńimen jańartyldy. Bıyl kolledjderde oqýǵa 7 myńnan astam oryn bólindi, – dedi oblys ákimi aıtýly is-sharada.
Aıta keteıik, jumysshy kadrlardy tıimdi, sapaly daıarlaý úshin qajetti jaǵdaılar jasalyp keledi. Oqý oryndaryna jańa jabdyqtar satyp alýǵa osy jyly 384 mln teńge jáne jóndeý jumystaryn júrgizýge 180 mln teńgege jýyq qarajat bólingen.
Búginde 5 myńnan astam stýdent dýaldy oqytý júıesi boıynsha óndiristegi naǵyz kásibı mamandardyń janynda bilim alyp jatyr. Bir jyl buryn kolledjderge qamqorlyq qoldaý kórsetetin kásiporyndar sany 30 bolsa, qazirgi tańda olardyń qatary 200-den asyp otyr.
Shara sheńberinde bilikti kadrlardy daıarlaýda, dýaldy oqytýdy damytýda jáne jumysshy mamandyqtarynyń oń ımıdjin qalyptastyrýda joǵary nátıjeler kórsetken óńirdiń kásiporyndary men kolledjderi marapattaldy.
Máselen, «Jyldyń úzdik mesenaty» nomınasııasy «Kazsınk» JShS-ǵa, «Úzdik áleýmettik seriktes» nomınasııasy О́skemen tıtan-magnıı kombınatyna, Úlbi metallýrgııalyq zaýytyna, О́skemen jylý elektr ortalyǵyna jáne taǵy birneshe kásiporynǵa berildi.
– Dýaldy oqytý boıynsha kórsetkish kóbeıip, 30-dan 200-ge deıin óndiris mekemeleri qoldaý kórsetýge kiristi. Ol degenimiz kolledj úshin óte mańyzdy. Erteńgi kúni túlekter jumyspen qamtylady. Álemdik, respýblıkalyq baıqaýlarda oqýshylarymyz kózge túsip, júldege jetip jatyr. Bastalǵan jumystar jalǵasyn taba beredi, – dedi О́skemen joǵary polıtehnıkalyq kolledjdiń dırektory Isataı Isın.
Al «Úzdiksiz bilim berý seriktesi» nomınasııasy S.Amanjolov atyndaǵy Shyǵys Qazaqstan ýnıversıtetine, D.Serikbaev atyndaǵy Shyǵys Qazaqstan tehnıkalyq ýnıversıtetine jáne Qazaqstan-Amerıkan erkin ýnıversıtetine tabystaldy. Sondaı-aq WorldSkills, AgroSkills jáne Abilympics-2025 respýblıkalyq chempıonattarynyń jeńimpazdary men júldegerlerine Shyǵys Qazaqstan oblysynyń ákimi atynan baǵaly syılyqtar berildi.
