Qalada jumysqa ornalastyrýǵa arnalǵan «Jobfair365» jáne oqytýǵa baǵyttalǵan «SkillBridge» servısterimen jabdyqtalǵan «Jasalmaty.kz» aqparattyq portalyna 25 myńnan astam biregeı qoldanýshy kirgen. Qazaqstannyń 20 óńirinen 3 myńnan astam jumys berýshi tirkelip, 5 myńnan astam bos jumys orny jarııalanǵan. Jyl basynan beri bul servıster arqyly 1,8 myń jas maman jumysqa ornalasqan. Qalada Jastar mansap ortalyǵy jumys isteıdi. Ol jumys berýshilerdi, Eńbek mobıldiligi ortalyǵyn jáne oqý oryndaryn bir alańǵa biriktirip, olardyń ózara áreketin jedel úılestirýge múmkindik beredi. Ortalyq ashylǵaly beri 5 myńnan astam jas maman júgingen, olardyń 4 myńy jumysqa ornalasýǵa kómek alǵan. Almatynyń iri jumys berýshileri men joǵary oqý oryndary birigip 8 Mansap kúni ótkizilip, 1,9 myń jas jumysqa turǵan.
«Jyl basynan beri jastarǵa teń múmkindik jasap, damýy men ózin-ózi júzege asyrýyna júıeli túrde jaǵdaı jasalyp keledi. «Jasyl el» ulttyq jobasy aıasynda jaz kezinde 2,1 myń jas ýaqytsha jumyspen qamtyldy. Bıyl qańtar aıynan beri Eńbek mobıldiligi ortalyǵy arqyly 9,7 myń jas jumysqa ornalasty. Jalpy jyl basynan beri 19,5 myńnan astam jas maman eńbekke tartyldy. Biz jastarǵa bilim men daǵdy ǵana emes, naqty jumysqa ornalasý jáne mansaptyq ósýdiń jolyn usynatyn júıe quryp jatyrmyz. Oqytý men jumysqa ornalasý qatar júretin úderis. Bul jastar áleýetin naqty múmkindikterge aınaldyrady», dedi Almaty qalasy Jastar saıasaty basqarmasynyń basshysy Azız Kajdenbek.
